Allt öðruvísi útrás hefst

Of Monsters and Men er heitasta hljómsveitin á Íslandi í dag. 2011 var annað starfsár hljómsveitarinnar, en þrátt fyrir það landaði hún útgáfusamningi við Universal, umboðsmanni og kórónaði árið með gullplötu fyrir sölu á fyrstu plötunni, My Head Is an Animal. Nú vinnur hljómsveitin að því að betrumbæta plötuna fyrir útrás sem á ekkert skylt við það sem við Íslendingar tengjum við það orð.

Ein stærsta tónlistarfrétt síðasta árs var samningur hljómsveitarinnar Of Monsters and Men við útgáfurisann Universal. Fljótlega í kjölfarið byrjuðu hjólin að snúast og hljómsveitin sendi frá sér stuttskífuna Into the Woods í desember í gegnum iTunes.

Skífan fór fljótlega á lista yfir vinsælustu plötur vefverslunarinnar og situr í dag í efsta sæti Heatseekers lista Billboard, sem einblínir á hljómsveitir og tónlistarmenn á uppleið. Magnaður árangur það.

Ragnar Þórhallsson, söngvari og annar gítarleikari Of Monsters and Men, er ánægður með árangurinn en ánægðastur með ferðalögin sem eru fram undan. Nýja árið fer nefnilega að miklu leyti í útrás Of Monsters and Men. Endurbætt útgáfa plötunnar My Head is an Animal, sem kom út á Íslandi á síðasta ári og seldist í meira en 5.000 eintökum, kemur út á vegum Universal og í kjölfarið heldur hljómsveitin í tónleikaferðalag sem hefst á tónlistarhátíðinni South by Southwest í Texas í Bandaríkjunum í mars. Þaðan liggur leiðin til fleiri ríkja Bandaríkjanna í sendibíl og eftir það er Evrópa og jafnvel Ástralía á dagskránni.

„Að geta ferðast út um allt er algjör snilld," segir hann. „Ég hlakka mest til þess. Allt annað gerist eða gerist ekki. Við erum að fá tækifæri til að sjá heiminn og gera það sem okkur finnst gaman."

Spurður hvort þetta sé líf sem hann hafi látið sig dreyma um segist Ragnar svo ekki vera, enda sé Of Monsters and Men fyrsta hljómsveitin hans. „Og ég er 24 ára," segir hann. „Sumir í hljómsveitinni hafa verið með þennan draum frá því að þeir voru litlir. Ég leyfi mér að dreyma þetta núna og mig dreymir vel."

Hlutirnir hafa gerst hratt hjá Of Monsters and Men sem vann Músíktilraunir árið 2010, skömmu eftir að hún var stofnuð. Nú er svo komið að meðlimir hljómsveitarinnar hafa tekið sér frí frá námi og störfum til að geta sinnt hljómsveitinni og tekið að fullum krafti þátt í starfinu sem er fram undan.

„Þetta er búið að gerast hratt og maður nær ekki að pæla mikið í því. Ég hef stundum orðið hræddur og stressaður, en svo fatta ég hvað þetta er mikil snilld og leyfi mér að rúlla með," segir hann.

Útgáfusamningur var ekki það eina sem rak á fjöru Of Monsters and Men í fyrra því bandaríski umboðsmaðurinn Heather Kolker tók hljómsveitina að sér. Hún starfar hjá umboðsskrifstofunni Paradigm Agency í New York. Þar sér hún meðal annars um tónleikabókanir fyrir hljómsveitir á borð við MGMT og Edward Sharpe & The Magnetic Zeros. Of Monsters and Men er fyrsta hljómsveitin sem hún tekur að sér umboðsmennsku fyrir.

Í viðtali við Fréttablaðið í apríl sagði hún umboðsmennskuna vera nýja upplifun fyrir sig. „Ég hafði lengi leitað að hljómsveit, en vildi ekki vera umboðsmaður nema ég myndi finna mjög sérstaka hljómsveit sem ég elska á allan hátt," sagði hún. „Ég vildi ekki bara dá tónlistina, heldur líka sjá möguleika á því að hljómsveitin yrði farsæl. Þá vildi ég elska fólkið í hljómsveitinni, en slíkt er ekki auðvelt að finna í þessum bransa."

Ragnar er mjög ánægður með samstarfið. „Það er mikið pælt í öllu og málin rædd áður en ákvarðanir eru teknar. Hún hjálpar okkur í því. Hún þekkir þetta allt."

Það er eitthvað traustvekjandi við að hafa konu í þessu.

„Já, ég elska að vinna með konum, frekar en körlum. Hún er ekki í einhverjum svörtum jakkafötum, eða eitthvað."

Of Monsters and Men er nú í hljóðverinu Sýrlandi ásamt upptökustjóranum Jacquire King. Hann er enginn aukvisi í bransanum og stýrði til dæmis upptökum á plötunni Good News for People Who Love Bad News með Modest Mouse og Aha Shake Heartbreak, Only by the Night og Come Around Sundown með Kings of Leon. King segir í samtali við Popp að árangur Of Monsters and Men á vinsældalistum komi sér ekki á óvart.

„Þetta er samt æðislegt og sjaldgæft, en þau eiga þetta skilið að mínu mati," segir hann. Ragnar segir mjög gaman að fá tækifæri til að vinna með King. „Þetta er öðruvísi vinkill á að taka upp, síðast voru það bara við. Nú erum við komin með annað auga og eyra. Þetta er mjög gott. Við erum að prófa hann í fimm lögum, ekki allri plötunni, sem er gott fyrir okkur til að sjá hvort við fílum þetta. Og þetta er algjörlega að virka eins og er. Þetta er lærdómsríkt fyrir svona unga hljómsveit eins og okkur."