Sannleikurinn: Snjallsímar eiga 51,2% barna

51,2% barna í fjórða til tíunda bekk grunnskóla eru viljalaus verkfæri snjallsímanna sinna. 41% sögðust aðeins eiga venjulega farsíma og hafa einhverja stjórn á lífi sínu ennþá en gátu ekki beðið eftir því að gerast þrælar tækninnar eins og aðrir.

Þetta kemur fram í könnun sem SAFT gerði á netnotkun barna og unglinga. Tæp 4% sögðust eiga skífusíma en gert er ráð fyrir að þau hafi verið að reyna vera fyndin.

Börnin eru líklegri til að eiga snjallsíma eftir því sem foreldrar þeirra eru vitlausari. Í 10. bekk sögðust 66% hafa átt snjallsíma en nú á hann þau og stjórnar lífi þeirra.

Flest átta ára þegar þau eignast fyrsta símann

Þau börn sem áttu farsíma voru spurð áfram hversu gömul þau voru þegar þau eignuðust sinn fyrsta farsíma. Flestir fengu sinn fyrsta farsíma í kringum átta ára aldurinn en talsverð aukning er meðal þeirra sem alltaf hafa átt sinn síma.

Alltaf verður algengara að verðandi mæður biðji lækni um að koma fyrir farsíma upp í legið ef fóstrið skyldi þurfa að hringja eitthvað eða láta vita af sér.

Tæplega 39% barna sem eiga farsíma nota símann til að eyðileggja líf sitt á samfélagsmiðlum

Börnin notuðu símann mest til að sýnast fyrir öðrum börnum (91,9%) og senda/taka á móti skammstöfunum ok, lol og brb í smáskilaboðum (77,1%). Ríflega helmingur notaði símann til að hlunnfara tónlistarmenn og um 42% höfðu gefið sálu sína Satan með því að spila tölvuleiki. Rúmlega 41% notaði símann til að hlaða niður ókeypis vírusum og tæp 39% til að fara á samfélagsmiðla eins og Facebook/Instagram og verða sér til skammar um aldur og ævi. Tæplega þriðjungur notaði símann til að hringja en flestir voru sammála um að það væri frekar gamaldags.

Þau börn sem áttu farsíma voru spurð áfram hvort þau fylgdu einhverjum reglum við farsímanotkun. Flestir, eða naumlega 53%, sögðust ekki senda nektarmyndir til fólks sem það þekkti ekki. Rúm 48% sögðust ekki mega vera með símann í baði vegna fyrri óhappa. Engar reglur gilda um farsímanotkun tæplega 30% þeirra barna sem eiga farsíma.

Aðeins rúmlega 2% íslenskra barna og unglinga sögðust hafa fattað það að síminn væri að taka yfir líf þeirra og eina leiðin til að vera frjáls væri að ferðast aftur í tímann til að tortíma Alexander Graham Bell áður en hann næði að koma uppfinningu sinni á framfæri.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  þar sem hægt er að nálgast okkur hvenær sem er.