Einn afkastamesti lagahöfundur okkar tíma

Maður hefur heyrt því slengt fram að lagasmíðar séu krefjandi og erfiðar. Oft líður langur tími milli þess að sveitir og tónlistarmenn gefa út nýtt efni og í einhverjum tilvikum hefur það hvarlað að manni að uppáhalds hljómsveitin hafi einfaldlega farist í flugslysi og það bara gleymst að tilkynna það.

Hljómsveitir gefa út örfáar plötur, samtals ná þær einhverjum tugum laga og talað er um að það sé bara hellingur. Matt Farley lætur þetta tónlistarfólk líta illa út. Ekki bara illa út,- hann lætur það líta út eins og pípara sem setur upp fjögur til fimm klósett einhverstaðar, lætur það bara duga og eyðir restinni af starfsævinni að sjá um viðhald og viðgerðir á aðeins þessum klósettum.

Á seinustu sex árum hefur Matt Farley samið, tekið upp og gefið út 14.000 lög undir ýmsum formerkjum. Fjöldi laga er slíkur að það er ekki hægt að kalla sig áhugamann um tónlist ef maður veit ekki hver hann er. Með hljómsveitum eins og The Toilet Bowl Cleaners, The Hungry Food Band, The Birthday Band For Old People og sem The Paranormal Song Warrior, hefur Matt slegið í gegn á veitum eins og iTunes og Spotify. Hægt er að sjá lista yfir hljómsveitirnar hans hér.

Hugmyndafræði hans sem listamanns er nokkurn veginn sú að magn er betra en gæði. Það er ekki aðalatriðið að reyna semja frábært lag heldur nýta frekar tímann til að semja mjög mörg undir meðallagi góð lög.

Á seinasta ári þénaði Matt um 2 milljónir á þessum 14.000 lögum sínum. Það er kannski ekki stórkostleg upphæð en boltinn er byrjaður að rúlla og þegar Matt hefur náð 50 þúsund laga markmiði sínu þá ætti hann að vera vel settur.

Lögin hans eru fáanleg allstaðar þar sem hægt er að kaupa eða borga fyrir tónlist á netinu og þau eru nokkuð auðþekkjanleg þar sem þau heita öll skemmtilegum og frumlegum nöfnum sem Matt notar til að vekja forvitni hjá fólki. Og í hvert sinn sem það heppnast fær hann svona 70 aura.