Oddvitaáskorunin: Hvæsti duglega á ímyndaðan kött

Vísir stendur fyrir Oddvitaáskoruninni 2018 þar sem skorað er á oddvita allra flokka í kjördæmum um land allt að taka þátt. Áskorunin felur í sér stutta kynningu og að svara nokkrum léttum spurningum. 



Njáll Ragnarsson leiðir Eyjalistann í Vestmannaeyjum í sveitarstjórnarkosningunum.

Njáll Ragnarsson er oddviti Eyjalistans í Vestmannaeyjum. Hann er 34 ára gamall og er að taka þátt í sínum fyrstu kosningum. Njáll er menntaður stjórnmálafræðingur en hann starfar sem sérfræðingur hjá Fiskistofu í Vestmannaeyjum. Áður var hann framkvæmdastjóri Fiskmarkaðs Vestmannaeyja, þannig að reynslan er helst úr sjávarútvegi.

„Ég er í sambúð með Matthildi Halldórsdóttur og saman eigum við eina dóttur, Kolbrá sem er fjögurra ára. Fyrir á frúin Lindu Björk sem er 16 ára. Þannig að við erum svona klassísk íslensk fjölskylda! Best finnst mér að vera með þeim en annars eru mín helstu áhugamál tengd útiveru og veiði, ég er þónokkuð í skotveiði á haustin og dúttla við sjóstangaveiði yfir sumartímann.

Ég er byrjandi í þessu öllu saman og þetta er búið að vera mjög skemmtilegt. Ég fer í þetta til þess að gera eitthvað gagn, leggja mitt af mörkum til þess að bæta samfélagið okkar og taka þátt í að móta það til framtíðar. Ég er passlega bjartsýnn fyrir kosningunum. Það er mín trú að allir á listanum okkar séu hið vænsta fólk sem á það sameiginlegt að vilja leggja sig fram og starfa fyrir bæinn af heilum hug. Ef svo væri ekki myndi sennilega enginn leggja þetta á sig!“

Hver er fallegasti staðurinn á Íslandi?

Að sjálfsögðu eru það Vestmannaeyjar, nema hvað!

Hvar á Íslandi myndir þú helst vilja búa? (Fyrir utan eigið sveitarfélag)

Mér finnst rosalega fallegt á Húsavík. Ætli ég myndi ekki velja Húsavík.

Hver er uppáhaldsmaturinn þinn?

Lambalærisneiðar í raspi.

Hvaða mat ert þú bestu/ur að elda?

Ég er mjög fær í að hita pylsur í potti!

Hvað er það vandræðalegasta sem komið hefur fyrir þig, sem segja má frá?

Ég er svakalega ómannglöggur og gleymi oft nöfnum fólks sem ég á að þekkja. Það hafa orðið mörg vandræðaleg augnablik sem má tengja við þennan galla. Svo er eitt og annað sem ég hef bara fyrir mig! 

Uppáhalds „guilty pleasure“ lag?

ABBA. Öll lögin þeirra…

Draumaferðalagið?

Austur Asía. Mig hefur alltaf langað til að ferðast um austurlönd fjær.

Trúir þú á líf eftir dauðann?

Já.

Besti hrekkurinn sem þú hefur gert eða lent í?

Eldsnemma að morgni 1. apríl síðastliðinn kom kærastan til mín skelfingu lostin og sagði að það hefði köttur hlaupið inn í bílskúr meðan hún var þar. Ég sem var nýkominn á fætur rauk af stað í skúrinn og hvæsti út í öll loft. Ég var að fara að hækka róminn þegar ég heyri hláturinn í henni og áttaði mig á aðstæðunum. Ég er ákaflega einfaldur þegar kemur að svona hrekkjum…

Hundar eða kettir?

Hundar. Á þó ekki hund.

Uppáhalds „guilty pleasure“ bíómynd?

Ég er maðurinn sem horfði á sínum tíma þrisvar á Sex and the City myndina. Ég er ekki stoltur af þessu…

Hvaða leikari ætti að leika þig í bíómynd?

Mér var einu sinni líkt við Hugh Grant. Segjum það þá bara.

Í hvaða Game of Thrones ætt værir þú og af hverju?

Viðurkenni: Hef ekki horft á það.

Hefur þú verið tekin/n af lögreglunni?

Keyrði of hratt einu sinni. Var stoppaður og sektaður.

Uppáhalds tónlistarmaður?

David Bowie. Ekki spurning.

Uppáhalds bókin?

Er ekki mikill lestrarhestur, en þegar ég les þá finnst mér gaman að lesa ævisögur. Er t.d. í dag að lesa ævisögu Kennedy.

Uppáhalds föstudagsdrykkur?

Ég verð að segja bjór. Það er svona föstudags.

Uppáhalds þynnkumatur?

Hamborgari með frönskum.

Þegar þú ferð í fríið, sólarströnd eða menning?

Menning. Borgarferðir höfða meira til mín en sólarferðir.

Hefur þú pissað í sundlaug?

Ábyggilega sem krakki. En ekki svona í seinni tíð.

Hvaða lag kemur þér í gírinn?

Rebel Rebel með David Bowie.

Er eitthvað smávægilegt sem farið hefur í taugarnar á þér í þínu sveitarfélagi sem þú vilt laga?

Ekki beint í taugarnar á mér en vissulega er ýmislegt sem betur má fara.

Á að banna flugelda?

Nei. Alls ekki.

Hvaða landsliðsmaður í knattspyrnu værir þú og af hverju?

Ég gat aldrei neitt í fótbolta, gafst endanlega upp 14 ára gamall þegar ég áttaði mig á því að ég yrði aldrei atvinnumaður. Ég væri ábyggilega ágætur í hlutverkinu sem Siggi Dúlla er í í dag.

Oddvitaáskorunin er hluti af kosningaumfjöllun Vísis. Öllum oddvitum á landinu býðst að taka þátt. Áhugasamir oddvitar geta verið í sambandi við [email protected]. Tekið verður við efni fram að kosningum.