Gítarinn besta gjöfin

Elín Sif Halldórsdóttir tónlistarkona rifjar upp eftirminnileg atvik frá jólum.

Morgunmatur á jóladag?

Amma og afi eru alltaf með bröns á jóladag svo ég borða yfirleitt á mig gat af því sem þau hafa útbúið.

Besta jólabókin?

Amma mín skrifaði bók sem heitir Jólasveinarnir sem segir frá ævintýrum íslensku jólasveinanna þrettán. Hljóðbókin var alltaf í spilun inni í herberginu mínu frá 1. desember og til jóla þegar ég var lítil. Hún fer aftur í spilun hjá mér fljótlega.

Besta jólalagið?

Ef ég þyrfti að velja væri það Hin fyrstu jól eftir Ingibjörgu Þorbergs við ljóð Kristjáns frá Djúpalæk. Ég lærði það þegar ég var fimm ára í Ísaksskóla og heillaðist alveg.

Besta jólamyndin?

Love Actually! Eru ekki allir sammála um það annars?

Jólahefð úr æsku sem enn er viðhöfð í dag?

Fjölskyldan mín hefur reyndar haldið upp á ótrúlega mikið af mismunandi jólum á mismunandi stöðum. Þó eiga öll jólin það sameiginlegt að við borðum góðan mat, syngjum mikið og við pabbi horfum á allan Lord of the Rings-bálkinn saman.

Mesta jólaklúðrið?

Jólin okkar heima eru alltaf svo afslöppuð að það er ekki mikið pláss fyrir klúður. Mamma og pabbi lentu þó einu sinni í því, þegar þau bjuggu í Kanada með elstu systur mína litla, að allir pakkarnir sem sendir höfðu verið frá Íslandi komu ekki fyrr en í febrúar. Ég var vissulega ekki fædd en þau segja þessa sögu oft.

Besta jólagjöfin?

Mamma og pabbi gáfu mér fyrsta gítarinn minn í jólagjöf fyrir nokkrum árum. Mjög kær gjöf.

Fyrsta jólagjöfin sem þú manst eftir?

Ég fékk fjólublátt glimmer­þríhjól þegar ég var eins og hálfs árs. Ég hélt mikið upp á það. Held það sé mögulega enn þá til niðri í bílskúr.