Magnaður flutningur Árnýjar Margrétar í Hall­gríms­kirkju

Árný Margrét hafði verið í tónlistarskóla sem barn en áhuginn kviknaði þó ekki af alvöru fyrr en hún varð unglingur. Hún fékk fyrsta gítarinn í fermingargjöf og byrjaði þá að æfa sig heima.

„Þá byrjaði ég að hlusta meira á tónlist og prófaði að semja sjálf. Þá byrjaði ég svona að taka þessu alvarlega,“ segir unga tónlistarkonan um upphafið.

Þrátt fyrir að hafa verið í tónlistarskóla hafði hún ekki lært á gítar. Hún hafði setið einn valáfanga í gítarkennslu í skólanum en er að öðru leyti alveg sjálflærð.

Á þessum tímapunkti hlustaði hún mikið tónlistarmennina Ásgeir og Bon Iver sem hún segir hafa veitt sér innblástur þegar hún byrjaði að semja sína eigin tónlist. 

Í dag hefur hún samið fjölmörg lög sem hún byggir á eigin reynslu.

„Þetta er bara svolítið eins og að skrifa dagbók. Ég fer alveg djúpt en reyni líka að blanda inn veðrinu og umhverfinu til þess að búa til einhverja mynd og setja þetta í samhengi.“

„Þegar maður er svona feiminn þá er þetta rosalega erfitt“

Árný Margrét segist hafa byrjað seint að koma fram enda hafi hún verið afar feimin.

„Ég þorði þessu alls ekki. Það voru einhverjir svona tónleikar í bænum mínum, Ísafirði, og ég spilaði eitt lag þar og það var alveg hræðilegt. Ég var svo stressuð. Það gekk alveg vel en þegar maður er svona feimin þá er þetta rosalega erfitt.“

Þetta var árið 2018 og var þetta hennar fyrsta framkoma. Ferillinn fór þó ekki á flug alveg strax en Árný Margrét hélt áfram að semja tónlist og æfa sig inni í herberginu sínu.

„En svo komst ég í samband við Högna Egilsson í lok árs 2019. Stjúpsystir hans bjó á Ísafirði og ég komst í samband við hana og hún hafði samband við hann. Ég fór að vera í bandi við hann alltaf þegar ég kom suður og þá fór boltinn að rúlla.“

Árný Margrét fór að taka upp tónlist með Högna og tóku þau meðal annars upp lagið Ties sem Árný Margrét samdi.

„Svo segir hann við mig seinna að hann sé að vinna í mynd og hann vilji fá þetta lag í myndina. Það virkaði bara rosalega vel og lagið kom í myndinni Þriðji póllinn.“

Högni kom Árnýju Margréti í samband við Kidda Hjálm sem gerðist umboðsmaður hennar. Í kjölfarið landaði hún samningum við fyrirtæki í Bandaríkjunum og Bretlandi. Með samningi sínum við breska fyrirtækið One Little Independent Records, fetar Árný Margrét í fótspor tónlistarkonunnar Bjarkar og tónlistarmannsins Ásgeirs.

„Þetta er allt svo nýskeð. En þetta er rosalega skrítið, að vera allt í einu komin með einhverjar bókunarskrifstofur og samninga. Þetta er alveg ruglað dæmi og maður er alltaf að fríka út reglulega.“

Fyrir ári síðan var Árný Margrét stödd erlendis í lýðháskóla en kom heim yfir jól og áramót. Það var hins vegar alltaf planið að fara aftur út eftir áramót og halda áfram í skólanum.

„En Covid fokkaði því upp og allt fór í rugl. Ég vissi ekkert hvað ég ætti þá að fara gera og þurfti aðeins að endurskoða hvað ég ætlaði að gera við líf mitt. En svo gerðist þetta allt bara svo hratt.“

Það má því segja að heimsfaraldurinn hafi verið lán í óláni fyrir Árnýju Margréti. Í dag vinnur hún að sinni fyrstu plötu sem væntanleg er á næsta ári. Þá eru tvö gigg á döfinni hjá Árnýju og þar á meðal eitt í Edinborg.

„Þetta er alveg rosalega skrítið. Ég held ég sé ekki alveg búin að gera mér gein fyrir þessu.“

Þá mun Árný Margrét einnig koma fram í beinu streymi á Iceland Airwaves þann 6. nóvember. Hér fyrir neðan má sjá frumflutning á myndbandi sem Árný vann ásamt Landsbankanum í tengslum við Iceland Airwaves.