North West klæddist bol frá Virgil Abloh með stolinni mynd af Bryndísi Ingu

Bolurinn er einn af þeim fyrstu sem Virgil Abloh hannaði fyrir merki sitt Pyrox fyrir mörgum árum síðan. Hönnuðurinn lést um helgina eftir tveggja ára baráttu við sjaldgæft krabbamein. 

Ljósmyndin sem er framan á bolnum er frá Íslenskum ljósmyndara, Katrínu Bragadóttir, en hönnuðurinn fékk ekki leyfi hennar fyrir notkun myndarinnar á sínum tíma. 

„Ég tók þátt í þessari myndatöku veturinn 2011,“ segir Bryndís í samtali við Lífið. Myndin var tekin í kirkjugarði í Reykjavík en með henni í myndatökunni voru fyrirsæturnar Brynja Jónbjarnardóttir og Kolfinna Kristófersdóttir. Myndirnar tók Katrín Braga en stílisti var Stella Björt Bergmann og um förðun sá Margrét Sæmundardóttir.

„Við ákváðum að setja þetta verkefni saman en þetta var ógreitt,“ segir Bryndís um myndatökuna. Nokkrum árum síðar fékk hún óvænt senda mynd af Kanye West í bol með myndinni framan á og þannig komst hún að því að Virgil Abloh hefði notað myndina í línu sína.  Bryndís var sautján ára þegar myndin var tekin.

„Við vorum ekkert að athafast í þessu. Katrín reyndi samt að kanna þetta mál á þessum tíma. Virgil var persónulegur stílisti Kanye West á þessum tíma. Ég held að hann hafi kannski fundið þessa mynd á Flickr.“

Kim Kardashian og Ye, áður Kanye West, mættu saman á síðustu Louis Vuitton sýningu Virgil Abloh í gær, sem haldin er í vikunni eftir andlát hans. Klæddist North dóttir þeirra umræddum bol og stuttbuxum úr þessari sömu línu.  Þetta vakti mikla athygli enda voru Kim og Ye nánir vinir hönnuðarins til margra ára.

„Mér finnst þetta mjög klikkað, mig langar bara í eintak af þessum bol. Þetta er ótrúlega skemmtilegt og skrítið. Af hverju valdi hann þessa mynd? Hvernig fann hann myndina? Það er mörgum spurningum ósvarað. Mér finnst þetta fyrst og fremst skemmtilegt.“

Ekki náðist í Katrínu Braga við vinnslu fréttar en samkvæmt Bryndísi reyndi ljósmyndarinn að leita réttar síns þegar bolurinn kom á markað. Síðar hafi Katrín rætt við hönnuðinn í eigin persónu.

„Katrín hitti Virgil í samkvæmi í Kanada fyrir nokkrum árum, áður en hann varð svona frægur. Hann gekkst við þessu og sagðist ætla að hafa samband en gerði það svo aldrei.“

Hún bendir á að nú þegar Virgil Abloh er fallin frá, eru bolirnir og þessi hönnun enn verðmætari.

„Mér finnst sérstakt að Virgil Abloh hafi gert þetta. Mér finnst eins og hönnuður ætti að skilja mikilvægi þess að stela ekki vinnu annarra til að græða á því,“ segir Bryndís.  Fleiri stjörnur hafa síðan þá klæðst þessari hönnun, meðal annars ASAP Rocky og nú síðast North West. 

Bryndís segist vera að íhuga að leita réttar síns í þessu máli eða að minnsta kosti útvega sér eintak af bolnum, þó auðvitað í samráði við Katrínu ljósmyndara. 

 „Ef einhver lögfræðingur er vel að sér í svona málum má hann endilega hafa samband,“ segir Bryndís að lokum.