„Áður fyrr vaknaði ég alltaf klukkan fimm svo ég hefði tíma fyrir sex“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Áður fyrr vaknaði ég alltaf klukkan fimm svo ég hefði tíma fyrir sex.

En nú er það búið og vakna ég bara í rólegheitum um klukkan sjö og fer beint í vinnuna.“

Hvað er það fyrsta sem þú gerir á morgnana?

„Þetta er mjög einfalt hjá mér þessa dagana, ég vakna klæði mig, kyssi konuna bless.

Það er lítið annað að gera, börnin og konan sjá um sig sjálf.

Hausinn samt alltaf á fullu hjá mér um leið og ég vakna, ég sé bara mat og kökur fyrir mér um leið og ég vakna og þangað til að ég sofna aftur. Besta hugleiðsla sem til er matur og meiri matur.“

Þegar þú hugsar til baka til unglingsáranna, hvaða tónlist/lag eða hljómsveit kemur upp í hugann sem uppáhald?

„Fyrsta minningin mín um tónlist er að sjálfsögðu kóngurinn Elvis og ég held enn þá upp á hann.Svo kom upp ein af mínum uppáhalds hljómsveit AC/DC.

En besta minningin mín um tónlist er þegar hljómsveitin Drýsill var stofnuð árið 1985. Þeir gáfu út eina plötu og voru gefnar út að ég held eitt þúsund eintök og ég keypti mér eintak í forsölu. 

Þegar platan var gefin út mætti Eiríkur Hauksson söngvari sveitarinnar heim til mín með eintakið. 

Ég var sofandi og mamma fór til dyra og fékk næstum hjartaáfall að sjá Eirík með síða rauða hárið sitt, spyrja eftir mér og með plötuna undir hendinni. 

Þetta var sko alvöru hljómsveit með alvöru þungarokk. En mamma lifði þetta af sem betur fer.“

Í hvaða verkefni ertu að vinna helst í þessa dagana?

„Verkefni mín þessa dagana eru nú frekar einföld en samt svo svakalega flókin. Að opna veitingastað með öllu tilheyrandi er meira en að segja það.

Aðalverkefnið er að mæta í vinnu klukkan átta og reyna að vera kominn heim fyrir klukkan ellefu á kvöldin. Þess á milli er ég bara að hringsnúast um sjálfan mig, Það er bara verið að elda og baka allan daginn, frá morgni til kvölds. Eina truflunin eru viðtöl eins og þetta, sem brjóta samt aðeins upp daginn hjá mér.“

Hvernig skipuleggur þú þig í vinnu?

„Þar sem ég er nýbúinn að opna Felino staðinn er allt algert skipulag kaos hjá mér. Sem betur fer þá fer staðurinn vel af stað sem er bara lúxus vandamál sem þarf að leysa á hverjum degi.

Eina skipulagið mitt er að mæta með bros á vör glaður í vinnuna og sjá bara hvað gerist og leysa öll mál sem koma upp. 

Hefur allavega gengið næstum því allt upp hingað til því allt reddast. Enda er ég með gott fólk með mér allan daginn sem nennir að hlusta á tuðið í mér. Eina alvöru skipulagið er að redda því sem þarf að gera og gera það strax.“

Hvenær ferðu að sofa á kvöldin?

„Það er ekki flókið hjá mér í dag hvenær ég fer að sofa, bara þegar ég kem heim á kvöldin. Þarf reyndar að kynna mig fyrst fyrir heimilisfólkinu því það sést svo lítið af mér heima þessa dagana. Svo leggst ég bara á koddann, hugsa um mat og er byrjaður að slefa mínútu seinna.“