Starfsfólk andlega þreyttara í blönduðu fyrirkomulagi

Í nýlegri umfjöllun BBC Worklife kemur fram að starfsfólk sem starfar í blönduðu fyrirkomulagi er að upplifa meiri andlega þreytu en starfsfólk sem annað hvort starfar alveg í fjarvinnu eða alveg á vinnustaðnum.

Í umfjöllun BBC er tekið dæmi um breska konu sem frá haustinu 2021 hefur unnið í fjarvinnu á þriðjudögum og fimmtudögum, en mætir á vinnustaðinn mánudaga, miðvikudaga og föstudaga.

Konan heitir Klara og eins og svo margir aðrir, upplifði hún nýja fyrirkomulagið sitt sem algjöra draumastöðu að vera í þegar að það var innleitt í september í fyrra. 

Nú, tæpu ári síðan, er hún hins vegar búin að átta sig á því að henni líður betur og gengur betur dagana sem hún starfar heiman frá.

Kvöldin áður en hún á að mæta á vinnustaðinn fer hún hins vegar að upplifa kvíða yfir því að eiga að mæta á vinnustaðinn daginn eftir. Þá finnst henni það þreytandi að vera alltaf að flytja tölvuna sína og fylgidót á milli staða.

Hvað segja rannsóknir?

Niðurstöður alþjóðlegrar könnunar Tinypulse sýna að ríflega 80% stjórnenda telur starfsfólk andlega þreyttari ef það er að vinna í blönduðu fyrirkomulagi miðað við aðra hópa.

Sem þó er athyglisvert í ljósi þess að í kjölfar heimsfaraldurs voru niðurstöður rannsókna í flestum vestrænum löndum að sýna mjög skýrt að mikill meirihluti starfsfólks hafði áhuga á blönduðu fyrirkomulagi.

Í umfjöllun Atvinnulífsins hefur til dæmis komið fram, að samkvæmt niðurstöðum Gallup á Íslandi í kjölfar Covid, sáu flestir fyrir sér að snúa ekki alveg til baka úr fjarvinnu á vinnustaðinn, heldur hafði fólk frekar áhuga á útfærslum þar sem það gæti unnið að hluta til heima og að hluta til á vinnustaðnum.

Að vinna 2-3 daga í viku í fjarvinnu var það sem um og yfir 70% svarenda völdu sem sinn draumavalkost.

Snýst þetta um vinnutilhögunina frekar en hvar?

Sérfræðingur sem BBC ræðir við um málið, segir margt benda til þess að það sem er að gera fólk svona andlega þreytt, sé fyrst og fremst þessi flutningur á milli staða fyrir vinnuna sína og vinnuumhverfi. 

Hins vegar sé ekkert sem segi að blandaða fyrirkomulagið sé ekki enn það sem koma skal, en mögulega með breyttu hugarfari.

Til dæmis þurfi vinnustaðir að skoða vel hvernig til tókst með innleiðinguna og hvernig vinnustaðurinn er að meta blandað fyrirkomulag og það sem í því felst. 

Eru stjórnendur til dæmis að ná að koma eins fram við alla, óháð því hvar eða hvenær fólk er að vinna?

Enn sem komið er býr atvinnulífið yfir meiri þekkingu á því hvernig tókst til með fjarvinnu á tímum heimsfaraldurs. 

Það sé því gott að rýna í hvað hægt er að lesa úr niðurstöðum um blandað fyrirkomulag og reyna að átta okkur betur á því hvar stóru tækifærin liggja. Þannig að arðsemi vinnustaðarins aukist en um leið starfsánægja og líðan starfsmannsins.

Í umfjölluninni er bent á að mögulega eigi viðhorfið okkar til blandaðs fyrirkomulags að vera annað en það er í dag.

Vinnustaðir og starfsfólk eigi meira að horfa til þess á hvaða tímum og dögum hentar starfsfólki best að vinna og afkasta, frekar en á hvaða stað það vinnur eða að það þurfi að vera á milli klukkan 9-17 eða 8-16 á virkum dögum.

Þá er á það bent að andleg þreyta eykur líkurnar á kulnun og annað versnandi heilsufar.

Umfjöllun BBC má lesa hér.