Musk vísar í uppljóstrara í nýju bréfi til Twitter

Bréfið var sent í gær en opinberað í dag.

Ásakanir hans sneru að miklu leyti að því að samfélagsmiðillinn væri óöruggur og forsvarsmenn Twitter hefðu blekkt notendur og yfirvöld varðandi hve illa varðar persónuupplýsingar notenda væru.

Sjá einnig: Fyrrverandi öryggisstjóri segir Twitter berskjaldað gegn tölvuárásum

Musk skrifaði í apríl undir samning um að kaupa Twitter á 44 milljarða dala, eða 54 dali á hlut.  Virði hlutabréfa Twitter stendur þegar þetta er skrifað í fjörutíu dölum á hlut.

Auðjöfurinn lýsti því þó yfir í síðasta mánuði að hann væri hættur við kaupin og bar hann fyrir sig því forsvarsmenn Twitter hefðu ekki orðið við kröfum hans um gögn og upplýsingar um raunverulegan fjölda falskra reikninga og svokallaða botta. Hann sagðist þurfa þær upplýsingar til að meta raunverulegt verðmæti Twitter.

Auðjöfurinn nefndi einnig að tveimur háttsettum starfsmönnum Twitter hefði verið sagt upp, án samráðs við sig eins og kaupsamningurinn segir til um.

Forsvarsmenn Twitter hafa þó hafnað því og hafa höfðað mál gegn Musk, sem er stærsti hluthafi Twitter, með því markmiði að hann verði látinn standa við kaupsamninginn.

Lögmenn Musks hafa stefnt Zatko og vilja fá hann í vitnaleiðslur vegna réttarhalda sem hefjast í haust. Í bréfinu sem lögmenn hans sendu Twitter segir að ásakanir Zatkos styðji það að Musk hafi verið blekktur af stjórnendum Twitter og hann eigi rétt á því að samningnum verði rift, samkvæmt frétt CNBC.

Zatko hefur einnig haldið því fram að stjórnendur Twitter hafi sagt ósatt um getu þeirra til að greina og eyða fölskum reikningum og bottum.

Í svari Twitter við nýjasta bréfi Musks segir að kröfur hans byggi á yfirlýsingum utanaðkomandi aðila sem forsvarsmenn Twitter hafi þegar sagt innihalda rangfærslur og þurfa meira samhengi. Twitter hafi ekki brotið gegn kaupsamningnum og enn standi til að láta Musk standa við hann.