Finnst gott að brjóta saman sokka eftir erfiðan dag

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég er farinn af stað um korter í sjö. Finnst frábært að ná smá tíma með sjálfum mér áður en ég pikka í Heru konuna mína og við förum svo saman inn til 9 ára guttans og vekjum hann í rólegheitunum. Hann er frekar mikill drollari á morgnana, en notaleg stund saman er undirstaða frábærs dags og því vekjum við hann tímalega, kveikjum á þæginlegri birtu og setjum svo kósy playlista á youtube í gang sem fær að rúlla á meðan verið er að gefa þeim sutta að borða og gera hann kláran inn í daginn.

Eftir að hafa keyrt hann í skólann kem svo aftur heim í svo kallaðan morgunbolla. Þar sem talsvert meiri truflun á sér stað yfir daginn en á morgnanna finnst mér og Heru þetta besti tíminn til þess að spjalla um allt milli himins og jarðar á uppbyggilegan hátt ásamt því að fara yfir verkefni dagsins og komandi daga. Þarna á sér stað mjög djúp og einlægt samtöl yfir kaffibolla sem er mér afar dýrmætt og í raun nauðsynlegt því það er líka vinna að vera í sambandi og þarna gefst klukkutími til að spjalla saman.

Síðan förum við saman í ræktina þar sem hann Elmar einkaþjálfari kemur deginum vel af stað. Það gleymdist kannski aðeins að tala um morgunrútínuna mína með köldu vatni í andlitið ásamt því að drekka ískalt vatn á fastandi maga sem sjokkerar aðeins líkamann og keyrir þannig öll efnaskipti vel í gang. Þessi rútína gerist þarna einhversstaðar á milli droll tímans hjá guttanum og að skutla honum í skólann. En umfram allt skiptir máli að byrja daginn vel en ekki hlaupa af stað í einhverju stressi sem keyrir upp stresshormón og aðra vitleysu í líkamanum.“

Í hvaða heimilisverki ertu: a) bestur í og b) vonlaus í?

„Við þessa spurningu þurfti ég að fá aðstoð frá yfirmanni heimilisverka. Og rétt eins og mig grunnaði þá vildi yfirmaðurinn meina að ég væri nú bara ekki vonlaus í neinum heimillisverkum og í raun væri ég bara mjög þægilegur sambýlismaður. En með aðeins meiri alvöru þá hef ég nú alltaf verið frekar snyrtilegur og gengið vel frá eftir mig. Myndi segja að það kæmi svona frekar nátturlega til mín. 

Finnst oft gott að gleyma mér í auðveldu verkefni eins og að brjóta saman sokka eftir erfiðan dag. Það gefur manni færi á að hugsa því það þarf ekki mikla kunnáttu í þetta sokka verkefni. 

Annars myndi ég segja að ég væri bestur úti á grillinu. 

Eða telst það ekki með sem heimillisverk?“

Í hvaða verkefni ertu að vinna helst í þessa dagana?

„Ég er í mikilli tiltekt þessa dagana. Er að færa mig úr verkefnum og reyna að minnka aðeins við mig. Það er búið að vera gríðarlega mikið á minni könnu síðustu mánuði og getur það tekið mikið á andlega að þurfa að vera með mörg járn í eldinum.

Ég er því þessa dagana að koma mér yfir í ný og færri verkefni sem ég mun leggja allt kapp á að láta ganga upp á komandi mánuðum og vonandi árum.

Án þess að ég geti sagt frá því hvaða verkefni þetta eru þá er þó eitt þeirra mjög spennandi podcast sem ég er að fara að koma í loftið ásamt einstaklega góðu fólki og mun vonandi líta dagsins ljós fljótlega. 

Um eitthvað alveg nýtt og spennandi verður um að ræða sem ég hlakka mikið til að hafa sem eitt af þessum nýju verkefnum mínum.“

Hvernig skipuleggur þú þig í vinnu?

„Ég myndi vilja geta sagt að ég væri búinn að mastera skipulagningu en það væri töluvert frá sannleikanum. Ég er í raun alltaf að leita nýrra og betri leiða til að ná utan um verkefni mín og nota mjög basic hluti eins og Notes og Calendar í makkanum mínum. Ég reyni að setja sem mest inn í þessi forrit þannig að ekkert gleymist. Svo reyni ég yfirleitt að skipuleggja mig þannig að það sé tími á hverjum degi fyrir eitthvað sem ekki var búið að skipuleggja eða gera ráð fyrir.

Þannig að það má segja að ég sé ekki nema svona 70% skipulagður yfir daginn. Þessi 30% fyllast svo alltaf þegar dagurinn fer af stað. Ég vil sömuleiðis helst ekki skipuleggja allt of mikið langt fram í tímann, því þegar maður vinnur í svona fjölbreytilegu umhverfi eins og ég geri þá eiga hlutirnir það til að breytast hratt.“

Hvenær ferðu að sofa á kvöldin?

„Það er ekki langt síðan að ég var lítið fyrir það að virða svefninn minn og átti það til sérstaklega eftir langa vinnudaga að detta í þátt sem endaði með því að ég var ekki farinn að sofa fyrr en um eitt tvö leitið. Í dag hinsvegar reyni ég að virða þessa heilögu stund sem svefn er og reyni að vera kominn uppí rúm hálf ellefu til ellefu. Það er ekki alltaf sem það tekst en ég er alltaf að ná betri og betri tökum á því, enda er svefninn svo sannarlega eitt af því allra mikilvægasta þegar kemur að góðri heilsu.

Svefnherbergið breytist svo í helli með þykkum myrkvunar gluggatjöldum þannig að engin birta komist inn til að trufla svefninn, hitastigið alltaf í kringum 19 gráður og svo finnst mér gott að taka smá öndun í 3-5 mínútur. Þá hlusta ég á andadráttinn, en með því móti hverfa allar hugsanir og maður fær VIP miða beint inn í djúpsvefninn.“