Besta spáin 2023: Skagfirsk sveifla upp og niður

Venju samkvæmt spáir íþróttadeild Vísis og Stöðvar 2 Sports fyrir um gengi liðanna í Bestu deild kvenna fyrir mótið. Keppni í deildinni hefst þann 25. apríl með þremur leikjum. Fyrstu umferðinni lýkur svo 26. apríl með tveimur leikjum.

Íþróttadeild Vísis og Stöðvar 2 Sports spáir því að nýliðar Tindastóls lendi í 9. sæti Bestu deildar kvenna í sumar og leiki í Lengjudeildinni sumarið 2024.

Markmið Tindastóls er þó klárlega að koma í veg fyrir að fall verði raunin og það sem liðið hefur fram yfir hópinn sem féll haustið 2021 er dýrmæt reynsla af því að spila í efstu deild. Síðast mátti reyndar alls ekki miklu muna að Tindastóll héldi sér uppi en örlögin réðust á 1-0 tapi gegn Keflavík á heimavelli.

Stólarnir komust upp úr harðri baráttu fjögurra liða í Lengjudeildinni í fyrra en töpuðu aðeins einum leik allt tímabilið og það var gegn HK í byrjun móts. Hefði Tindastóll náð sigri gegn FH í lokaumferðinni hefði liðið unnið Lengjudeildina en niðurstaðan varð 2-2 jafntefli og FH endaði því á toppnum.

Stýrði liðinu upp í fyrstu tilraun

Tindastóll mætir nú til leiks með heimamanninn Halldór Jón Sigurðsson, Donna, í brúnni en hann þjálfar bæði kvenna- og karlalið félagsins. Donni, sem er með nokkuð langan þjálfaraferil og hefur áður meðal annars stýrt Þór/KA í efstu deild, tók við Tindastóli eftir fallið haustið 2021 og kom liðinu því aftur upp í fyrstu tilraun.

Donni hefur þurft að bregðast við ákveðnum skakkaföllum í vetur en ef liðsstyrkurinn sem liðið hefur sótt kemur vel út ætti Tindastóll að geta haft betur í baráttunni fyrir lífi sínu í deildinni.

Liðið leit ágætlega út í Lengjubikarnum eftir tvo stóra skelli og mikið veltur á góðri byrjun á tímabilinu en Tindastóll byrjar á þremur heimaleikjum í röð og þar af eru tveir gegn Keflavík og FH, mögulegum keppinautum í neðri hlutanum.

Liðið og lykilmenn

Sóknarleikur Tindastóls veltur gríðarlega mikið á Murielle Tiernan sem hefur raðað inn mörkum fyrir liðið í Lengjudeildinni. Hún náði sér ekki á strik tímabilið sem Tindastóll átti í efstu deild 2021, og skoraði aðeins tvö mörk, en meiðsli munu hafa ráðið miklu um það.

Murielle kom til Tindastóls þegar liðið var enn í C-deild, árið 2018, og þessi bandaríska markamaskína hefur síðan skoraði 90 mörk í 82 deildarleikjum fyrir Tindastóls. Hún skoraði líka þrjú mörk í Lengjubikarnum í mars og ætti að vera sá leikmaður sem andstæðingar Tindastóls hafa mestar áhyggjur af.

Markvörðurinn Amber Michel var einnig mjög áberandi hjá Tindastóli 2021 og varði mark liðsins í þrjú ár en er nú hætt. Það mun mæða mikið á arftaka hennar, Monicu Wilhelm sem er einnig frá Bandaríkjunum, en það gefur góð fyrirheit að hún náði tveimur síðustu leikjunum í Lengjubikarnum og fékk bara á sig eitt mark. Sauðkrækingar eiga svo einnig efnilegan markvörð í Margréti Rún Stefánsdóttur.

Tindastóll fékk þýska varnarmanninn Gwen Mummert í vetur, ekki síst vegna áfallsins þegar Kristrún María Magnúsdóttir sleit krossband í vetur, og fyrirliðinn öflugi Bryndís Rut Haraldsdóttir fær því nýjan og öflugan makker í miðri vörninni. María Dögg Jóhannesdóttir er einnig fjölhæf og sterkur varnarmaður.

Þá eru frábærar fréttir fyrir Tindastól að Laufey Harpa Halldórsdóttir sé mætt aftur heim með sinn eitraða vinstri fót, að láni frá Breiðabliki en þangað fór hún eftir frumraun sína í efstu deild 2021. Hannah Cade og Melissa Garcia halda líka kyrru fyrir, og Hugrún Pálsdóttir átti flotta leiktíð í fyrra og er ein af máttarstólpunum úr liðinu sem lék í efstu deild fyrir tveimur árum.

Fylgist með

Það er kannski brjálæði að nefna hér leikmann sem ekki hefur lokið grunnskóla en hin 15 ára gamla Elísa Bríet Björnsdóttir er afar efnileg og fékk að spila talsvert í Lengjubikarnum í vetur. Hún er frá Skagaströnd og raðaði inn mörkum í yngri flokkum, og lék svo sína fyrstu landsleiki í október þegar hún var valin í U15-landsliðið. Hvort sem það verður í sumar eða síðar þá verður spennandi að sjá Elísu spreyta sig í deild þeirra bestu.

Í besta/versta falli

Því miður fyrir Skagfirðinga þá kæmi ekkert á óvart ef að Tindastóll héldi limbóinu áfram og félli á ný niður í Lengjudeildina, og það gæti vel farið svo að liðið endi í neðsta sætinu. Hins vegar, ef allt smellur, getur liðið forðað sér frá falli og það yrði risastórt skref fyrir fótboltann á Sauðárkróki. Liðið endar þó varla ofar en í 7. sæti í allra besta falli.