Heitustu trendin í haust

Tíska

Sigrún Ásta Jörgensen, stílisti:

„Hausttískan er að mínu mati er mjög fjölbreytt í ár. Litir á borð við bleikan og djúprauðan eru að koma mjög sterkt inn og ég reikna með því að vinsældir þeirra haldi áfram út næsta ár. Gallatískan, gallaefni ofan á gallaefni (e. denim on denim), heldur áfram vinsældum sínum sem mér finnst mjög skemmtilegt.“ 

„Öfgakennda gallatískan er líka enn í gangi þar sem gallaflíkurnar hafa verið klipptar til, þeim breytt í svokölluð extreme lúkk og blandað við önnur efni og áferðir og það finnst mér mjög smart.

Það líka hægt að sjá tímabils innblástur (periot inspiration) hjá flestum stóru hönnuðunum og virðast þeir sækja mikið í sjöunda og áttunda áratuginn og næntís tískuna. Stórar útvíðar buxur eru líka að eiga gott móment núna.“

Förðun

Sunna Björk Erlingsdóttir, förðunarfræðingur stjarna á borð við Björk Guðmundsdóttur:

„Það er svo gaman að sjá hvernig 90’s trendið heldur áfram velli inn í haustið en þá með nýjum og ferskum áherslum. Áberandi varablýanturinn paraður saman með ljósari varalit er nú farinn að sjást með vott af rauðum tóni í miðjunni og augnförðunin jafnvel orðin aðeins dekkri og meira „edgy“.“

„Á tískupöllunum erum við að sjá enn meiri tilraunamennsku með „statement“ varir og þá er jafnvel varalínan dekkt til muna og sanseraðir glossar settir yfir. Tónarnir eru síðan í sannkölluðum haustlitum og aftur erum við að sjá fjólubláu- djúp plómu- og vínrauðu varirnar með haustinu.“

„Á samfélagsmiðlum hefur „Latte makeup“ ​náð miklum vinsældum, sem er í rauninni bara ný útfærsla af brúnu smokey augnförðuninni. Mismunandi tónar af brúnum eru paraðir saman á augum, vörum og kinnum sem mynda þannig fallega harmoníu yfir andlitið. Húðin er síðan ljómandi, falleg og náttúruleg.“

Matur

Hrefna Rósa Sætran, kokkur og eigandi Grillmarkaðsins, Fiskmarkaðsins, Skúla Craftbar og Uppi bar:

„Það sem verður heitt í matnum í haust er allskonar karrý og karrý réttir. Kóreskur matur hefur verið að trenda en núna mun tælenskur matur taka við af honum. Það er talað um að seinni bylgjan í tælenskum fine dining sé að lenda erlendis. Hráefni eins og chili hunang, Yuzu koshu (salt, chili og börkur af yuzu ávextinum), romm, drekaávöxtur og alvöru kavíar eru heit núna.“

Drykkir

Jakob Eggertsson, sigurvegari í Barþjónn ársins 2023 og meðeigandi baranna Jungle og Bingo:

„Mín spá er að vinsældir tequila munu halda áfram að aukast og mezcal mun loksins fá þá ást sem hún á skilið. Spicy mezcal margarita gæti orðið mjög heit. Einnig munu low ABV drykkir, það er að segja drykkir með lægri áfengisprósentu, koma sterkir inn.“

Uppskrift fyrir Spicy mezcal margarítu:

50ml mezcal

25ml lime safi

25ml triple sec

5ml sykursýróp

1/4-1/2 biti af jalapeno

Pínu klípa af salti

Drykkurinn er hristur og síðan síaður í rocks glas með klökum og skreyttur með jalapeno sneið eða lime bát.

Hreyfing

Birgitta Líf, markaðsstjóri World Class:

„Ég held að það verði ekkert lát á Barre vinsældunum en núna erum við að flytja inn Barre þjálfara frá LA til að halda þjálfaranámskeið. Í kjölfarið hefjast Barre námskeið á þó nokkrum staðsetningum í World Class.

Svo eru bardagaíþróttir að koma mjög sterkar inn meira hjá almenningi sem vilja ögra sér örlítið með öðruvísi hreyfingu en ekki endilega með keppni í huga og aðgang að öðru tímaúrvali hjá World Class í leiðinni. Við erum bæði með starfrækt World Class MMA og World Class Boxing Academy.

Yin yoga, infrared hot yoga og pílates er líka alltaf vinsælt inn í veturinn og verða ýmis slík námskeið í boði hjá okkur.“

Tónlist

Snorri Ástráðsson, plötusnúður og umboðsmaður:

„Undanfarið ár hefur danstónlist ráðið ríkjum á skemmtistöðum landsins í bland við nýja íslenska popptónlist. Þegar ég hugsa til haustsins sé ég ekki fram á mikla breytingu á því.

Ég tel þó að í bland við bassaþunga danstónlist muni íslenska rappið eiga sér endurkomu í haust. Nýtt efni er væntanlegt frá hinum ýmsu röppurum og ber þar kannski helst að nefna tónlistarmanninn Flona sem er farinn að byggja upp spenning fyrir komandi plötu sinni, Floni 3.

Sá tónlistarmaður sem ég tel að muni springa út í haust er ofurpródúsentinn Izleifur. Von er á debut plötu hans núna snemma í haust og það sem heyrðist á hinum ýmsu tónlistarhátíðum í sumar frá honum er með því ferskasta sem hefur komið í langan tíma.“

Í spilaranum hér að neðan má heyra lagið Á heilanum með Izleifi:

Myndlist

Ásdís Þula Þorláksdóttir, eigandi Gallerý Þulu:

„Í raun er listheimurinn ekki með mjög afgerandi breytingar milli árstíða eins og margt annað. En það er gaman að skoða það sem af er árs út frá því sem spáð var í byrjun þess. Það var svo sannarlega rétt að stór abstrakt-málverk halda velli. Þá erum við að tala um 140x140 cm og upp í 200-300 cm.

Litirnir eru djarfir og dansa milli pastelpallettunnar og yfir í djúpbláar og hárauðar pensilstorkur. Það er mikill húmor og léttleiki sem virðist ríkjandi á öllum sviðum, ekki jafn mikil íronía og kaldhæðni, kannski vottur af yfirgnæfandi einlægni í frásögninni.“

„Skúlptúrarnir eru efnisríkir og mér finnst persónulega að það megi leyfa þeim að njóta sín á miðju gólfi eða á óvæntum stöðum og gefa þeim nóg pláss. Sama má segja með útiverk, í stað þess að planta enn einu trénu að þá er magnað hvað flott úti-listaverk getur gert mikið fyrir umhverfi sitt og svo fá þeir sem eiga leið hjá að njóta líka.

Frame sjónvörpin eru mikið notuð nú fyrir listaverkastillur eða vídeó verk og gefur það tækifæri til að leika sér dálítið með sín uppáhalds verk úr listasögunni, en hún hefur þó verið töluvert verið uppi á teningnum í ár og verður líklega áfram þar sem fólk skoðar manninn á bak við „snillinginn“ eins og í sýningu The Brooklyn Museum‘It’s Pablo-matic’ stýrðri af Hannah Gadsby.“

„Þó svo að sú sýning hafi kannski ekki hlotið góða dóma þá finnst mér að þarna sé, líkt og í mörgum öðrum greinum, verið að rýna í söguna í gegnum nýja linsu. En almennt er þó lykillinn að listinni sá sami. Veldu með hjartanu og veldu til framtíðar. List er lífstíðarförunautur.“