Segir stjórnendur og stjórnir enn of einsleitan hóp og svigrúm til nýliðunar

Mín kynslóð, sem tók mjög ung við, sér í lagi í fjármálageiranum seint á síðustu öld, er enn við stjórnvölinn. 

Og reglubundin nýliðun er nauðsynleg og ég tel svigrúm fyrir fleira yngra fólk og fólk með fjölbreyttari menntun og reynslu miðað við það sem nú er.

Strategíudagurinn er haldinn í dag en þetta er í sjötta sinn sem dagurinn er haldinn. Yfirskrift dagsins að þessu sinni eru Hetjusögur úr atvinnulífinu.

Helga Hlín var nýverið kosin í stjórn Íslandsbanka þrátt fyrir að hafa ekki hlotið brautagengi til stjórnarsetu hjá tilnefningarnefnd, en eins og vart þarf að skýra út, vakti Íslandsbankamálið miklu fjaðrafoki í sumar.

Er í alvöru innistæða fyrir þessari yfirskrift – Hetjusögur úr atvinnulífinu - hjá íslensku atvinnulífi?

„Já sjálfsagt skortir innistæðu fyrir slíkri yfirskrift sums staðar og það eru alltaf tækifæri til að gera betur. En við fengum nokkra stjórnendur sem við vitum að hafa sýnt hetjulega tilburði við að bregðast við innri og ytri áskorunum og hugrekki og þol til að innleiða breytingar í stefnu, skipulagi eða stjórnarháttum. Það eru þessar árangurssögur sem við fáum að heyra um í dag og svo sannarlega má kalla þær hetjusögur,“ segir Helga Hlín.

Í tilefni Strategíudagsins fjallar Atvinnulífið um hetjusögur úr Atvinnulífinu í dag og á morgun.

Ekki nóg að eiga líkamsræktarkort

Helga Hlín segir dagskrá Strategíudagsins byggja á S-unum þremur: Stefnumótun, skipulag og stjórnarhættir. Hetjusögur verða sagðar undir hverjum lið.

„Umhverfið í dag krefst miklu meira af stjórnendum en áður, ekki síst hafa kröfur um gegnsæi og aðhald breyst, til dæmis með tilkomu samfélagsmiðla. En ytri áskoranir eru líka margar. Ég nefni sem dæmi áhrifin af Covid eða hækkandi verðbólgu og vaxtastig. Í sumum tilvikum eru stjórnendur að glíma við fjárhagsvanda á meðan aðrir verða fyrir áhrifum af pólitísku umhverfi, fyrirtækjamenninu og stafrænni þróun sem láta ekkert fyrirtæki ósnert, og á sama tíma hafa kröfur um stjórnarhætti gjörbreyst og svo mætti lengi telja.“

Helga Hlín segir kröfur nútímans líka taka mið af ýmsum mistökum sem áður hafa verið gerð. Þar skipti máli að stjórnendur sýni auðmýkt.

Þar sem rými er til úrbóta eða þar sem gerð hafa verið mistök, er rétta leiðin að sýna auðmýkt og sýna í verki að við höfum lært af þeim mistökum. 

Þol almennings og samfélagsins í heild sinni hefur líka breyst hvað þetta varðar og minna þol fyrir því að mistök séu gerð án þess að afleiðingar verði einhverjar.“

Sögustjóri á Strategíudeginum er Jón Björnsson, forstjóri Origo en hetjusögurnar segja forsvarsaðilar frá Ístaki, Umhverfisstofnun, Fríhöfninni, Samkaup, Akureyrarbæ, Rue de Net og Reykjavíkurborg. Dagskráin hefst klukkan níu og stendur fram að hádegi.

Aðspurð um hvað skorti helst til að ná góðum árangri og hetjusögum, nefnir Helga Hlín sem dæmi að þegar kemur að breytingastjórnun og úrbótum, sýni rannsóknir að um 70% fyrirtækja ná ekki að innleiða stefnu í kjölfar stefnumótunarvinnu.

„Í Strategíu þekkjum við það hins vegar úr okkar starfi að þessi 30% sem ná árangri er hópurinn sem tekur ákvörðun um tiltekna stefnu og þær breytingar sem henni fylgja, og fylgir þeim síðan skipulega eftir og af miklum aga,“ segir Helga Hlín og bætir við:

Mér finnst oft gaman að líkja þessu við þjálfun íþróttafólks. Því það er aldrei nóg að setja sér háleit markmið um tiltekinn árangur í keppni.

 Ef þú fylgir ekki eftir skipulegu plani og mælir árangurinn reglulega og aðlagar þjálfunina til samræmis, þá mun tilætlaður árangur ekki skila sér. 

Að ná árangri í breytingastjórnun snýst að mörgu leyti um sömu kröfur enda veit ég ekki dæmi þess að líkamsræktarkort eitt og sér hafi komið einhverjum í keppnisform.“