Margrét Vil­hjálms stígur aftur á svið

Níu ár eru síðan Margrét hlaut Grímuverðlaun sem leikkona ársins í aðalhlutverki í verkinu Eldraunin eftir Arthur Miller. Sýningin var sett upp í Þjóðleikhúsinu undir leikstjórn Stefans Metz árið 2014 og fékk samtals ellefu tilnefningar á sínum tíma. 

„Fyrir mér er það að stíga aftur á íslenskt leiksvið eins og að koma aftur heim. Lengst af hef ég unnið í Þjóðleikhúsinu og þykir mér afar vænt um að fá að leika þar aftur. Þetta var vinnustaðurinn minn í tæplega tuttugu ár.“

Skemmtilegt að starfa við norskt leikhús

Árið 2014 flutti Margrét, ásamt fjölskyldu sinni til Berlínar og eftir sex ára búsetu þar fluttust þau til Tromsø í Noregi, eða árið 2020. Þar starfaði Margrét með Hålogaland leikhúsinu.

„Það var skemmtileg reynsla að starfa við norskt leikhús. Verkið bar nafnið, Þegar stormar sem verst eftir Florian Zeller sem skrifaði meðal annars Föðurinn, sem var kvikmyndað með Antony Hopkins í aðalhlutverki. 

Þetta var frábært verk og gaman að kljást við norskuna. Ári síðar lék ég svo í spennandi uppfærslu á Frammúrskarandi vinkonu og lék fjögur mögnuð kvenhlutverk úr þessu dásamlega verki eftir Elenu Ferrante, í þessu fallega leikhúsi í Tromsø.“

Fjölbreytt reynsla og framandi ævintýri

Margrét segir þrátt fyrir fjölbreytta reynslu og framandi ævintýri alltaf dýrmætt að koma aftur heim. „Við vitum að lífið getur verið alls konar og það er alltaf að koma okkur á óvart. 

Það fylgdi því mikil öryggistilfinning að snúa aftur heim og halda á ný á gamla vinnustaðinn. Þar mætir þér sama lyktin og þú þekktir áður. Þú hittir oft sama fólkið og allt svona sirka bát í röð og reglu. 

Lífið með börnin í skólakerfinu, pólitíkin, hjónabandið svo ekki sé minnst á ólíkar skoðanir vina og vandamanna hvað varðar loftslagsmál og hvaladráp. 

Fyrir mína parta er mjög gott gott að fara bara í vinnuna og gera það sem maður lærði til og kann handverkið. Ég get í það minnsta með sanni sagt að ég nýt þess að gera það sem ég er ágæt í. Þannig líður mér núna.“

Kolsvart verk um ást og ofbeldi

Nýjasta verkefnið og um leið ástæða þess að Margrét er aftur mætt í Þjóðleikhúsið er uppfærslan á leikverkinu Ást Fedru eftir Söruh Kane. Margrét segir verkið margslungið. 

„Þetta er eitt magnaðasta verk okkar tíma og hefur verið leikið um allan heim, þó það hafi ekki ratað á svið á Íslandi fyrr. Það var það skrifað árið 1997 og Sarah kallaði það gamanleikinn sinn. Þetta er kolsvart verk um ást og ofbeldi.

Verk Söruh og fleiri höfunda þessa tímabils í leiklistarsögunni voru kölluð „in your face” leikhús. Verkið er tilraunakennt og bæði með texta og form. Hún virðist skrifa það beint inn í breskan samtíma með mikilli gagnrýni á samfélagið eftir Thatcher-ismann, bresku konungsfjölskylduna og í miðju Balkanstríðinu sem stóð frá 1991 til ársins 2001. Það er áhugavert að hugsa til þess að sama ár og Díana prinsessa lést í bílslysi, árið 1997, var verkið frumsýnt í Bretlandi.

Blanda af sápuóperu og grískum harmleik

Sarah vinnur verkið upp úr eða vitnar í gríska mytólógíu um Fedru og Hippólítus sem eru undir álögum Seifs og Afroditu og þar með á valdi örlaganna. Þetta er líklega góð blanda af sápuóperu og grískum harmleik sem að mínu mati er algjörlega frábær blanda.

Verkið er í þessari uppfærslu túlkað og leikstýrt af listakonunni og leikstýrunni Kolfinnu Nikulásdóttur. Hún með sínum fersku augum leiðir okkur inn í þennan hugarheim Kane. Filippía Elíasdóttir hannar sviðsmynd og búninga af sinni alkunnu snilld.

Dásamleg tónlist og hljóðmynd sýningarinnar í höndum Tuma Árnasonar og fögur myndbandshönnun og lýsing etir Ástu Jónínu Arnardóttur. 

Þetta er búið að vera magnað ferli fyrir mig og ótrúlega spennandi að fylgjast með nýrri kynslóð listamanna og leikara sem leika hlutverk sýningarinnar. Sigurbjartur Sturla fer með hlutverk Hippólítus og Þuríður Blær leikur Strófu. Grímuverðlaunahafinn, fyrr á þessu ári, Hallgrímur Ólafsson og Þröstur Leó eru einnig í stórum hlutverkum í sýningunni.“

Skellir sér í leikstjórastólinn

Æfingar hófust í vor og átti hópurinn snarpa endurkomu að verkinu nú í haust en frumsýningin er í kvöld, 9. september. Spurð hvað sé framundan segir Margrét nokkur önnur verkefni komin í vinnslu. „Ég ætla að skella mér í leikstjórastólinn og hlakka til skemmtilegs leikhúsvetrar.

 Auðvitað hvet ég alla að fara í leikhúsið enda frábær dagskrá svo ekki sé minnst á magnaðan díl Þjóðleikhússins á sérstöku afsláttarkorti fyrir ungt fólk. Ég hef mikla trú á að unga fólkið okkar hefði gaman að verkinu Ást Fedru og öðru spennandi í vetur.“