Þriðja vaktin marg­slungin segir fram­kvæmda­stjórinn sem varð ást­fangin af bróður vin­konu sinnar

„Þriðja vaktin heldur til dæmis utan um öll samskipti við skólana, panta tíma hjá lækni, kaupa jólagjafir og svo framvegis. Ég myndi því alltaf segja að fyrsta skrefið varðandi þriðju vaktina sé að viðurkenna hana sem aukaálag.“

Arna er heilbrigðisverkfræðingur að mennt sem tók nýverið við framkvæmdastjórastarfi Helix, nýju fyrirtæki sem Origo stofnaði.

„Helix stendur samt á gömlum grunni. Við erum um 59 starfsmenn hér og ég myndi segja að starfsemin nái aftur um þrjátíu ár sem starfsemi heilbrigðissviðs Origo.“

Eiginmaður Örnu er Daði Lárusson og eiga þau saman þrjú börn: Valdísi Silju fædda 2012, Freyju Huld fædd 2015, Steinunni Gróu sem er fædd árið 2022. Til viðbótar er Darri, sem Daði átti fyrir og Arna segist svo heppin að hafa fengið í bónus.

Fótboltastelpa í Seljunum

Arna er sjálf fótboltastelpa úr Seljahverfinu, fædd árið 1990.

„Þegar ég var lítil var í boði fyrir stráka að byrja að æfa fótbolta mun fyrr en stelpur. Ég var ekki sátt við það og fór því sjálf um 5 ára niður í ÍR, talaði þar við húsvörðinn og sagðist vilja æfa fótbolta,“ segir Arna og hlær.

„Úr varð að ég byrjaði að æfa og spila með stelpum sem voru 10 til 11 ára og það eru til sögur af því að á leikjum hafi foreldrar ætt inn á völlinn til að sækja mig. Því ég var svo lítil að margir héldu að ég væri bara að villast óvart inn á völlinn.“

Eftir grunnskóla fór Arna í Kvennaskólann í Reykjavík.

„Ég tók virkan þátt í félagsstarfinu þar og fannst mjög sjarmerandi að vera í skóla í miðbænum þar sem maður gat farið á kaffihúsin og svona,“ segir Arna og vísar til þess að fram að þessum tíma þekkti hún lítið annað en að vera í úthverfi.

„Ég tók mér samt árs pásu frá Kvennó og fór í tæpt hálft ár sem skiptinemi til Brasilíu. Það var afar lærdómsríkur tími því menningin þar er allt öðruvísi og það er mjög þroskandi að vera svona ungur og langt að heiman. Því þarna er ég 17 ára, bjó inni hjá ókunnugu fólki og algjörlega mállaus.“

Eftir stúdent fór Arna til Danmerkur í íþróttalýðháskóla og lærði einkaþjálfarann.

„Mig langaði að tengja íþróttahliðina og keppnismanneskjuna í mér við nám og Danmörk átti strax ofsalega vel við mig, ég féll fyrir danskri menningu og fannst gaman að vera þarna. Námið var þannig að við vorum í íþróttum og fræðum þeim tengdum frá morgni til kvölds.“

Eftir að Arna kom heim fór hún að vinna sem einkaþjálfari og í hóptímum í World Class og Sporthúsinu.

„Það var ótrúlega skemmtilegt en ég ákvað samhliða að fara í sjúkraþjálfarann í Háskóla Íslands því ég var enn að þreifa fyrir mér hvernig ég gæti tengt saman heilbrigði og íþróttir.“

Á endanum sá Arna tækifærin sem heilbrigðisverkfræðin gæti verið því að sjálf hafði hún alltaf haft mikinn áhuga á stærðfræði og sá fyrir sér að með heilbrigðisverkfræðinni gæti hún tengt allt þetta þrennt saman: Heilsu, stærðfræði og íþróttum.

Árið 2017 lauk Arna einnig meistaragráðu í viðskiptum.

Ástin og púslið

Þegar Arna var enn í sjúkraþjálfaranum tók hún saman við Daða.

„Ég átti í raun heima hjá mömmu og pabba í Seljahverfinu þangað til ég flutti til hans,“ segir Arna og hlær.

En það eru svo sem fleiri atriði nokkuð brosleg þegar upphaf sambandsins er rifjað upp.

„Því Daði er bróðir bestu vinkonu minnar,“ segir Arna og skellihlær.

Ég hafði því alltaf vitað af honum en auðvitað var þetta mjög skrýtið fyrst. En þetta gerðist allt svo óvart og ég myndi segja að það hafi eiginlega ekki verið aftur snúið eftir að málin fóru af stað.“

Daði hefur alla tíð verði mikið í fótbolta og stundað atvinnumennsku í boltanum að hluta. Það gefur því auga leið að fótbolti hefur alla tíð verið fyrirferðarmikil á heimilinu.

Arna var hins vegar enn í námi þegar tvær eldri dæturnar fæddust.

„Það má segja að hugmyndin að heilbrigðisverkfræðinni hafi fæðst með elstu dótturinni því að ég tók pásu frá námi í kjölfar þeirrar óléttu og það var einmitt þá sem ég fékk þá hugmynd að skella mér í verkfræðina.“

En var ekkert erfitt að vera í krefjandi háskólanámi með tvö lítil börn?

„Jú auðvitað tók það á. Ég viðurkenni það alveg. Við eigum reyndar ofsalega góða að, ömmur og afar í báðar áttir og það hafa einhvern veginn allir hjálpast að sem er ómetanlegt.“

Arna hlær þó af nokkrum minningum frá þessum tíma.

Ég man til dæmis eftir því að hafa verið í jólaprófum með miðjustelpuna mína tæplega tveggja mánaða gömul. 

Á meðan ég var í prófinu beið Daði með hana frammi á gangi. 

Síðan kom prófdómarinn og pikkaði í mig og lét mig vita þegar ég þurfti að fara fram á gang að gefa.“

Móðir Örnu tók líka að sér sama hlutverk og Daði í einhverju prófi en svona gekk þetta þá fyrir sig.

„Þetta er svona eins og með margt annað sem ég hef gert. Þar sem viðhorfið er einfaldlega að fara í gegnum hlutina og klára þá.“

Að taka samtalið

Arna starfaði hjá fyrirtækinu Medor frá árinu 2016 til 2020 og segir það hafa verið mjög skemmtilegan tíma.

„Medor selur lækningatæki og rannsóknarvörur og ég vann við að selja, þjónusta og markaðssetja lækningatæki. Viðskiptavinahópurinn minn var að mestu leyti bæklunarlæknar sem starfa mikið við liðskipti og fleira og það var mjög áhugavert að kynnast þeirra starfi,“ segir Arna.

Hjá Origo byrjaði Arna sem viðskiptastjóri á heilbrigðislausnasviði en færðist síðar í að stýra sölu – og markaðssetningu heilbrigðislausnasviðs. Fyrir stuttu var síðan tilkynnt um stofnun Helix og segir Arna ástæðuna fyrir því að ákveðið var að gera heilbrigðislausnarsviðið að sjálfstætt starfandi fyrirtæki væri til þess að auka á fókusinn í heilbrigðistæknigeiranum, en Helix þróar og þjónustar hugbúnað fyrir íslenskt heilbirgðiskerfi, meðal annars Heilsuveru, Sögu Sjúkraskrá og Smásögu öppin.

Flestir sem starfa hjá Helix eru tæknimenntaðir en þar starfar fólk líka til dæmis hjúkrunarfræðingar, heilbrigðisgagnafræðingar, sálfræðingar og sjúkraþjálfarar.

Arna segir fyrstu daga og vikur í nýju starfi nú þegar hafa verið lærdómsríkt og skemmtilegt ferli.

„Ég er auðvitað að taka við mjög góðu búi og mitt starf er að halda áfram að tryggja að vörurnar okkar blómstri og styðja við starfsfólkið. Ég myndi segja að hjá Helix væru mjög spennandi tímar framundan og það er mjög gaman að fá að taka svona stórt skref að leiða þetta fyrirtæki af stað sem kona í tæknibransanum.“

Álag síðustu vikna hefur verið töluvert og viðurkennir Arna að hún sé svo sem ekki búin að mastera neitt sem heitir jafnvægi heimilis og vinnu.

„Ég er reyndar ótrúlega mikil fjölskyldumanneskja í mér og við Daði hugsum þetta svolítið mikið þannig að þegar við erum með börnunum okkar, þá erum við ekki að gera neitt annað. Áherslan okkar í frítíma er fyrst og fremst að vera með þeim.“

Hún segir stuðning maka við konur á framabraut í íslensku atvinnulífi skipta miklu máli.

Að vera í krefjandi starfi með börn og heimili er púsl og þar sem þriðja vaktin hvílir enn þá meira á konunum er það svo verðmætt að eiga maka sem styður mann vel þegar konur eru að auka á sína ábyrgð og vinnu í starfsframan,“ 

segir Arna og bætir við:

„Hjá okkur er fótboltinn fyrirferðarmikill á heimilinu en hvað varðar almenna daglega verkaskiptingu er Daði að sjá um mikið. En hann er líka að þjálfa og ætli það sé ekki hægt að segja að þetta enska orðatiltæki um að ,,it takes a village,“ eigi ekki vel við hjá okkur. Því við erum svo heppin með að eiga marga góða að.“

Arna segist telja það mikilvægt að umræðan um þriðju vaktina aukist enn meira. Það muni hjálpa til með að auka á jafnvægi heima fyrir þannig að báðir foreldrar geti þó sinnt sínu í atvinnumennsku og starfi.

„Maður gerir sér vonir um að hjá næstu kynslóð verði þetta allt saman orðið enn jafnari, en það sem við getum þó gert núna er að opna enn betur á umræðuna um þriðju vaktina og viðurkenna að hún skapar aukið rekstrarálag á heimili. Kröfurnar á foreldra í dag eru líka miklar,“ segir Arna og bætir við:

En ef við viljum samfélag þar sem konur fá tækifæri til þess að taka aukna ábyrgð í fyrirtækjum, er mikilvægt að við séum meðvituð um það í hverju þriðja vaktin felst, viðurkenna að hún er aukaálag og með samtali verðum við betur meðvituð um að þetta er vinna sem við þurfum líka að sinna saman.“