Umfjöllun,viðtöl og myndir: FH - Valur 32-28 | FH styrkti stöðu sína á toppnum

FH vann nokkuð öruggan sigur gegn Val 32-28 í toppslag Olís-deildarinnar. Heimamenn náðu yfirhöndinni í upphafi leiks og voru með leikinn í hendi sér nánast frá upphafi til enda. 

Það var mikill hraði í leiknum til að byrja með og bæði lið keyrðu í hvert sinn sem tækifæri gafst. Tjörvi Týr Gíslason, leikmaður Vals, skoraði fyrsta mark leiksins.

Eftir að hafa gert fyrsta markið í leiknum fór að halla undan fæti í sóknarleik gestanna. Tjörvi skoraði annað mark Vals þegar tæplega átta mínútur voru liðnar. FH komst í þriggja marka forystu 5-2. Um miðjan fyrri hálfleik komst FH fimm mörkum yfir.

Skammarverðlaun kvöldsins fær Ísak Gústafsson fyrir ömurlega vippu. Ísak fékk dauðafæri í stöðunni 7-3 þegar ekkert var að ganga hjá Val og reyndi hörmulega vippu sem Daníel Freyr Andrésson, markmaður FH, var í engum vandræðum með.

Eftir því sem leið á fyrri hálfleik fór Valur að spila betur. Björgvin Páll Gústavsson fór að verja meira í markinu og sóknarleikurinn varð betri. Staðan í hálfleik var 16-13.

Síðari hálfleikur byrjaði líkt og sá fyrri með marki frá Tjörva. Valsarar fóru illa að ráði sínu í upphafi síðari hálfleiks. Gestirnir voru að klikka á dauðafærum ásamt því að taka slæmar ákvarðanir og FH gekk á lagið.

Þegar að tæplega sjö mínútur voru liðnar af síðari hálfleik voru heimamenn komnir sex mörkum yfir og Óskar Bjarni Óskarsson, þjálfari Vals, tók leikhlé.

Valur fór að sækja í sig veðrið eftir því sem leið á síðari hálfleik og saxaði forskot FH-inga niður í þrjú mörk. Sigursteinn Arndal, þjálfari FH, tók leikhlé í stöðunni 26-23 en heimamenn voru í miklum vandræðum með að koma boltanum framhjá Björgvini Páli.

FH endaði leikinn afar vel og vann að lokum 32-28.

Af hverju vann FH?

Heimamenn tóku frumkvæðið snemma og litu aldrei um öxl. Valur byrjaði síðari hálfleik ágætlega og minnkaði forskot FH niður í tvö mörk. En þá skoruðu heimamenn fimm mörk gegn aðeins einu marki og gerðu út um leikinn. 

Hverjir stóðu upp úr?

Þessi sigur FH-inga var skólabókardæmi um liðssigur þar sem margir lögðu sitt af mörkum. Alls komust tíu leikmenn á blað hjá FH.

Aron Pálmarsson var öflugur í liði FH með sex mörk. Aron var einnig allt í öllu varnarlega og stal fjórum boltum.

Hvað gekk illa?

Valur byrjaði leikinn afar illa. Gestirnir gerðu aðeins þrjú mörk á fyrstu fjórtán mínútunum og náðu aldrei að gera þetta að jöfnum leik eftir það. 

Hvað gerist næst?

Á mánudaginn mætast Afturelding og Valur klukkan 19:30.

Þetta var síðasti leikur FH fyrir landsleikjahléið. Föstudaginn 2. febrúar mætast Víkingur og FH í Safamýrinni.

„Mér leið vel allan leikinn“

Óskar Bjarni Óskarsson, þjálfari Vals, var svekktur eftir tap kvöldsins.

„Við misstum þá í 5-6 mörk sem var erfitt. Þeir eru örlítið betri en við í dag og við lentum í vandræðum með leikkerfi hjá þeim. Síðan breyttum við um vörn og fórum að narta í þá en náðu ekki alveg að tengja þetta allt saman og gera leik úr þessu,“ sagði Óskar Bjarni í samtali við Vísi eftir leik.

Óskar Bjarni var ekki ánægður með hvernig Valur byrjaði leikinn en hrósaði liðinu eftir því sem leið á fyrri hálfleik.

„Það var smá spenna þarna í byrjun og við fórum með tvö góð færi. Í fyrri hálfleik vorum við með óvenju marga tæknifeila. Sóknarlega náðum ekki að slíta þá nógu mikið í sundur en samt skoruðum við 28 mörk.“

„Mér leið vel í hálfleik og mér leið vel allan leikinn. Leikurinn gegn þeim á okkar heimavelli var svona. Þú getur alveg unnið þrátt fyrir að vera nokkrum mörkum undir en við náðum ekki að klára þá.“

Óskar fór yfir stöðuna á þeim sem voru fjarverandi. Í kvöld vantaði Aron Dag Pálsson, Magnús Óla Magnússon og Róbert Aron Hoster. 

„Það væri betra að hvíla bæði Róbert og Magnús Óla í næsta leik á mánudaginn en Róbert gæti kannski komið inn en hann er meiddur í nára. Aron Dagur mun spila næsta leik en hann var að eignast barn og gat ekki verið með í kvöld,“ sagði Óskar Bjarni Óskarsson að lokum.