Ást sem kom á hár­réttum tíma

Hér má sjá myndbandið:

Bjartari tímar eftir dimm tímabil

Þetta er fyrsta lagið sem Þórunn Salka gefur út á íslensku en er hennar þriðja smáskífa.

„Ég hef verið að semja bæði á íslensku, ensku og dönsku. Íslenska er ótrúlega fallegt tungumál og mér finnst mjög gaman að semja á íslensku.

Lagið er áminning fyrir sjálfa mig að það koma bjartari tímar eftir dimm tímabil. Laginu má líkja við ástarbréf og fjallar um þær tilfinningar sem ég upplifði í upphafi nýs sambands. 

Ég var nýbúin að vinna úr áfalli og áfallastreituröskun. Þessi ást kom á hárréttum tíma þegar ég var búin að vinna í sjálfri mér.

Hlýjan og kærleikurinn á þessum tíma gerði það að verkum að mér leið eins og það væri sumar um hávetur. Það þýðir ekki að það þurfi ástarsamband til þess að það gerist en ég var nýbúin í mikilli sjálfsvinnu þegar ég loksins leyfði mér að vera opin fyrir ást. 

Andstæðurnar í árstíðunum eru einnig eins konar merki um að það sé hægt að finna fyrir jákvæðum tilfinningum í myrkum aðstæðum, fyrir mér snýst þetta um að líða vel í eigin skinni.“

Gaman að syngja á íslensku

Þórunn Salka samdi lagið fyrir þremur árum síðan, það er að segja textann og hljómana. Hún vann svo lagið áfram með Kaktusi Einarssyni sem pródúseraði lagið.

„Þetta er fyrsta lagið sem ég gef út sem fjallar ekki um erfiðar tilfinningar og því þykir mér extra vænt um það. Þetta er líka fyrsta lagið sem ég gef út á íslensku, en ég hef verið að semja bæði á íslensku, ensku og dönsku. Íslenska er ótrúlega fallegt tungumál og mér finnst mjög gaman að semja á íslensku.“

Hún sótti innblásturinn meðal annars í það hversu mikið veðurfar getur haft áhrif á hana.

„Lægðirnar geta haft áhrif á andlegu lægðirnar mína. Það er því kaldhæðnislegt að búa á Íslandi. Ég á afmæli á sumrin og mér líður alltaf vel í hita. En þetta snýst fyrst og fremst um að líða vel í sjálfri sér, þá ætti veðrið eða aðrir þættir ekki að hafa mikil áhrif á mann. Það er fyrst og fremst boðskapurinn með laginu.

Þrátt fyrir að innblásturinn komi frá ást þá hef ég líka verið að fá skilaboð frá hlustendum sem tengja við lagið á annan hátt. Til dæmis að þau urðu foreldrar í febrúar eða tengja einfaldlega við jákvæða sólargeisla í febrúar. Mér þykir mjög vænt um það.“

„Þurfum öll smá sumar í febrúar“

Í texta lagsins er að finna mikið af andstæðum og segir Þórunn Salka að hugmyndin hafi verið að koma því til skila í tónlistarmyndbandinu og myndefninu.

„Þess vegna er ég til dæmis með blóm í snjó. Það sama má segja um klæðnaðinn en ég var í skærgrænum jakka við hvítan klæðnað.

Hér var ég að ímynda mér að jakkinn væri grænn eins og sumarið og restin af klæðnaðinum hvítur eins og snjórinn. Við tókum upp á sólríkum degi sem beintengist andstæðunum sem ég er að reyna að túlka. Það er skemmtileg tilviljun að það er búið að vera met í sólríkum dögum eftir að ég gaf út lagið. Ég held við getum öll verið sammála um að við þurfum smá sumar í febrúar.“

Vann myndbandið með góðri vinkonu

Myndbandið er skotið á gamalli digital myndavél frá árinu 2000.

„Ég er mjög hrifin af upptökum frá þeim tíma. Tímabilið er nostalgískt og ég vildi vekja þær tilfinningar upp með myndbandinu. Þessi tími og þessar hlýju minningar frá því þegar maður var yngri og hafði ekki miklar áhyggjur af hlutunum, allavega ekki þessum stóru málum eins og að borga reikninga og svo framvegis.

Sigríður Margrét kær vinkona mín skaut myndefnið og treysti ég henni 100% fyrir sýninni minni. Ég þurfti ekki að leikstýra henni, hún veit nákvæmlega hvaða skot eru falleg og er ótrúleg flink í því sem hún gerir. Við kynntumst í Kaupmannahöfn en við vorum í sama námi í brand design í KEA. Við höfum haldið góðu sambandi síðan þá og vinnum saman í dag. 

Ég er oftast á bak við myndavélina í vinnunni og get því verið feimin að vera fyrir framan hana. Það er því ótrúlega dýrmætt að vinna með einhverjum sem þekkir mann svona vel,“ 

segir Þórunn Salka að lokum.