„Vin­konur mínar eru allar með tölu mestu gellur landsins“

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Hvað hún er alls konar, síbreytileg og allt er leyfilegt. Ég elska að sjá hvernig fólk tjáir sig með klæðaburði. Að fylgjast með fólki, eða people watching, er líka stórskemmtilegt sport. Geri það mikið þar sem ég ferðast vegna vinnunar og get setið ein lengi á kaffihúsi með góðan bolla og stúderað annað fólk.

Hver er uppáhalds flíkin þín og af hverju?

Ætli það sé ekki Hvisk veskið mitt sem ég fékk á útsölu fyrir einhverjum árum. Það er grænt og hvítt á lítinn sem er skemmtilegt kombó. Það fer líka svo vel við margt og hefur því mikið notagildi. Ég vel oftast að vera með það hversdags og fyrir aðeins fínni tilefni.

Ég keypti mér svo bleika loðkápu um daginn sem ég er yfir mig ástfangin af og fær að láta ljós sitt skína í London um helgina.

Eyðirðu miklum tíma í að velja föt hverju sinni?

Ég viðurkenni alveg að hugsa langt fram í tímann í hverju ég ætla að vera þegar eitthvað stendur til. Ég fer oft á samfélagsmiðilinn Pinterest og skoða alls konar samsetningar hjá öðrum til að fá innblástur. 

Dagsdaglega er það mjög misjafnt og jogging gallinn verður mjög oft fyrir valinu. Svo er hægt að dressa hann niður með strigaskóm eða upp með hælum og kápu.

Hvernig myndirðu lýsa stílnum þínum?

Street/casual og alls konar inni á milli. Breytilegur eftir dagsformi.

Hefur stíllinn þinn breyst mikið í gegnum tíðina og hvernig þá?

Já algjörlega, ég er til dæmis miklu opnari fyrir að prófa alls konar nýtt og er litaglaðari en ég var. Óhræddari við að fara í það sem lætur mig líða vel óháð því hvað er endilega í tísku. 

Fylgihlutir eins og veski og sólgleraugu eru líka orðnir stór partur af mínum fataskáp í gegnum árin.

Nýturðu þess að klæða þig upp?

Mér finnst það ótrúlega gaman og er það klárlega orðið áhugamál hjá mér. Ég þarf samt að gera meira af því dagsdaglega. Ræktarföt og snúður í hárið einkennir mína daga oftast. 

Finn sjálf hvað það gerir mikið fyrir sjálfstraustið að vera í góðu dressi og setja á sig maskara.

Hvaðan sækirðu innblástur í tískunni?

Vinkonur mínar eru allar með tölu mestu gellur landsins svo ég horfi mikið á hvað þær eru að klæðast. Einnig er Pinterest mitt go to til að sækja innblástur. Fylgi síðan nokkrar einstaklega smekklegar skandinavískar skvísur á Instagram. Þær eru alveg „meðetta“. 

Danska götutískan finnst mér líka mjög heillandi, en það gæti líka verið vegna þess að ég er fædd og uppalin þar og elska menninguna og allt sem við kemur dönskum stíl.

Ertu með einhver boð og bönn þegar það kemur að klæðaburði?

Það held ég ekki. Bara ekki vera kalt! Ekkert verra en að reyna að vera töff en frjósa í leiðinni. Tók það tímabil út sem unglingur. Mínípilsin, pinnahælar og toppur. 

Tískutímabil sem ég þarf ekki að endurtaka.

Hver er eftirminnilegasta flík sem þú hefur klæðst og af hverju?

Ætli það sé ekki grændoppótti samfestingurinn hennar mömmu. Flík sem á sér sögu og var sérsaumuð á hana þegar hún var ung. 

Svo held ég mikið upp á gráa jakkafatasettið sem ég klæddist á brúðkaupsdaginn minn. Töffaralegt og tímalaust. 

Býrðu yfir einhverju góðu ráði þegar það kemur að tísku?

Aldrei láta neinn segja þér að þú sért of gömul til að klæðast ákveðnum fötum. Láttu ljós þitt skína. Ekki taka þessu of alvarlega og farðu í það sem lætur þig líða vel.

Hér má fylgjast með Ernu Viktoríu á samfélagsmiðlinum Instagram.