Fækkuðu tímum í skrif­­finnsku um tugi klukku­­stunda á mánuði

Henný Björk Birgisdóttir, meistaranemi í stafrænni heilbrigðistækni í Háskólanum í Reykjavík, hefur rannsakað appið og hvaða áhrif notkun þess hefur fyrir starfsfólk á fjórum hjúkrunarheimilum á höfuðborgarsvæðinu. Forritið er hannað af Helix en þar var Henný í starfsnámi.

„Þar fékk ég áhuga á þessu og að skoða betur hvernig tæknin getur haft áhrif á starf heilbrigðisstarfsmanna,“ segir Henný sem sjálf er hjúkrunarfræðingur og starfar á Landspítala.

Meðal niðurstaðna rannsóknar hennar er að innleiðing á smáforriti, eins og Iðunni, hefur í för með sér tímasparnað og aukna yfirsýn á hjúkrunarheimilum. Sem dæmi kom fram að hægt sé að nýta um 22 tíma á hverjum mánuði í umönnun og aðhlynningu íbúa sem hefðu að óbreyttu farið í skriffinnsku og skráningar.

Einu hjúkrunarheimili tókst meðal annars að fækka daglegum vaktafundum starfsfólks úr þremur niður í tvo, þar sem yfirsýn starfsfólks hafði aukist með betri skráningu verka.

Faglærðum fækkað

Í þessu samhengi er gott að nefna að faglærðum einstaklingum á hjúkrunarheimilum hefur fækkað mikið undanfarin ár. Hjúkrunarfræðingar eru til að mynda einungis 10 prósent þeirra sem sinna umönnun á hjúkrunarheimilum.

„Það vita það flestir að það er skortur á heilbrigðisstarfsfólki en ég held að fólki geri sér kannski ekki grein fyrir því hversu slæm staðan er orðin,“ segir Henný og að samkvæmt athugun heilbrigðisráðuneytisins sé hlutfall hjúkrunarfræðinga sem koma að umönnun íbúa aðeins helmingur af lágmarksviði landlæknisembættisins.

„Svo íbúi fái viðunandi þjónustu á hjúkrunarheimili. Það sem er svo verra er að þessi fámenni hópur hjúkrunarfræðinga ef við rýnum ofan í störfin er frekar illa nýttur. Skráning er rosa stór hluti af okkur vinnu því samkvæmt lögum ber okkur að skrá niður allt sem við gerum fyrir skjólstæðinga okkar á hverri vakt. Skráningarskyldan er í raun svo mikil að ef verkið er ekki skráð þá er litið svo á að verkið hafi ekki verið unnið.“

Haka við fyrirframákveðin verk

Í viðtölum Hennýjar við starfandi hjúkrunarfræðinga á hjúkrunarheimilum kom fram að um 50 til 75 prósent af tíma þeirra í vinnu var varið fyrir framan tölvu í skráningar á bæði sínum verkum og þeirra sem sjá um almenna umönnun.

„Iðunn virkar þannig að það birtist listi yfir íbúana og þá þætti sem þarf að gera fyrir íbúann. Þegar starfsmaðurinn hakar við þessa þætti þá færist það sjálfkrafa inn í sjúkrasögu íbúans. Þar geta hjúkrunarfræðingarnir fylgst með því sem er verið að gera. Markmiðið með Iðunni er þessi rauntímaskráning. Að starfsmenn í umönnun merki við um leið og þeir séu að sinna einum íbúa eða að minnsta kosti þar til þeir fara til þess næsta. Þar af leiðandi berast upplýsingar hraðar inn í kerfið og hjúkrunarfræðingar fá upplýsingarnar fyrr.“

Með notkun Iðunnar hafi skriffinnska minnkað en skráningin einnig batnað, því allir starfsmenn skrá sjálfir það sem þeir gera. Þannig fæst einnig betri yfirsýn.

„Það að skrá niður hvenær einhver íbúi á hjúkrunarheimili fer í bað. Það er mjög mikilvægt, og að halda líka utan um klósettferðir því tíðni þeirra geta gefið okkur ýmsar upplýsingar. Þannig þetta eru í raun allt skráningarskyldar upplýsingar.“

Hvert verk skráningarskylt

Spurð hvort það sé hætta á að skráningin verði ónákvæmari segir Henný að hún ætti ekki að verða það. Á sama tíma og fólk haki við þá geti það skráð athugasemdir ef eitthvað þarf að kanna betur. Hjúkrunarfræðingarnir fái þessar upplýsingar í rauntíma og geti þá brugðist við strax.

„Segjum að einstaklingur fari í bað. Þá er hægt að haka við að hann fari í bað og bæta svo við stuttri lýsingu um það sé kannski einhver roði einhvers staðar og hjúkrunarfræðingurinn getur brugðist strax við.“

Henný spurði hjúkrunarfræðingana hversu mikinn tíma þær teldu Iðunni vera að spara þeim og voru svörin mjög ólík. Í einhverjum tilfellum þurfti ekki lengur að sinna daglegri skráningu.

„Í gamni mínu tók ég saman. Ef við gerum ráð fyrir að tími þeirra hafi styst um helming miðað við mönnun á hundrað manna heimili þá er að sparast um hálf vinnuvika á mánuði bara í þetta.“

Dæmið væri þá reiknað svona: 100 íbúa hjúkrunarheimili þar sem sex hjúkrunarfræðingar í heildina sinna morgun- og kvöldvöktum þar sem eftir farandi verk eru framkvæmd á einum sólarhring; allir hringja 2 símtöl í ættingja, eitt legusár sem fylgjast þarf með daglega og starfsmenn eru svo duglegir að skrá að hægt er að fella niður rapport. Þá sparast um það bil 43 mínútur á dag með tilkomu Iðunnar.

Sé sama rútína endurtekin á hverjum degi í einn mánuð (30 daga) gerir það 1.306 mínútur eða 21.75 klukkustundir á mánuði

Fleiri verk sem spari tíma

Henný segir fleira en bara skráninguna spara hjúkrunarfræðingum tíma. Sem dæmi sé hægt að framkvæma sáramyndatöku í síma sem appið er í og hlaða beint inn og hringja beint í aðstandendur.

„Það tók áður margar mínútur að taka mynd af sári og hengja inn í sjúkraskrá einstaklings. Nú tekur þetta um 20 sekúndur. Bara svona einfaldir hlutir telja fljótt þegar þeir eru lagðir saman.“

Henný segir að með slíkum tímasparnaði batni þjónustan.

„Hjúkrunarfræðingarnir hafa meiri tíma til að vera frammi. Vera með íbúunum og geta gefið sér meiri tíma í að sinna þeim verkum sem þær þurfa að gera.“

Henný segir að þau hjúkrunarheimili sem séu að nota appið hafi keypt sérstaka síma sem keyri appið og svo sé það tengt Internetinu á heimilinu. Þannig sé tryggt að enginn geti komist í upplýsingarnar utan heimilisins og ef einhver tekur óvart símann heim kemst hann ekki í upplýsingarnar þar.

Henný segist ætla að rannsaka efnið nánar og er að skrifa meistararitgerð þar sem hún fer nánar í þessar niðurstöður.

„Þetta er spennandi vettvangur sem býður upp á mörg tækifæri. Ég held að þetta sé bara byrjunin og við séum að fara að stíga stórt skref inn í stafræna framtíð.“