Manchester City Englandsmeistari fjórða árið í röð

Manchester City tryggði sér sinn fjórða Englandsmeistaratitil í röð er liðið vann 3-1 sigur gegn West Ham í lokaumferð ensku úrvalsdeildarinnar í dag.

Heimamenn í City byrjuðu af miklum krafti og virtust ekki hafa neinn áhuga á því að hleypa spennu í titilbaráttuna, en Arsenal átti enn möguleika á að stela titlinum fyrir lokaumferðina.

Phil Foden kom City yfir með frábæru skoti strax á annarri mínútu áður en hann tvöfaldaði forystuna með sínu öðru marki eftir tæplega tuttugu mínútna leik.

Gestirnir í West Ham minnkuðu þó muninn á 42. mínútu leiksins með aðeins sínu öðru skoti í leiknum. Þar var á ferðinni Mohammed Kudus með stórglæsilegt mark þegar hjólhestaspyrna hans flaug yfir höfuðið á Stefan Ortega í markinu og í netið.

Staðan í hálfleik því 2-1, Manchester City í vil, og því ljóst að baráttunni um Englandsmeistaratitilinn var ekki lokið.

Heimamenn sóttu þó án afláts í síðari hálfleik og Alphonse Areola hafði í nægu að snúast í marki West Ham. Að lokum varð eitthvað undan að láta og skot Rodri á 59. mínútu söng í netinu við gríðarlegan fögnuð leikmanna og stuðningsmanna City.

Þrátt fyrir þunga sókn City það sem eftir lifði leiks reyndist þetta síðasta mark leiksins. Niðurstaðan varð því 3-1 sigur Manchester City sem stendur því uppi sem enskur meistari, fjórða árið í röð.