Ný plata frá Birgi Hákoni: „Ég er ekki lengur þessi gaur nema í tón­listinni“

Birgir hefur talað opinskátt í fjölmiðlum um erfiða æsku sína; hvernig hann leiddist út í sölu eiturlyfja og þaðan út í handrukkun. Eftir að móðir Birgis greindist með krabbamein sneri hann við blaðinu og fann sér athvarf í tónlistinni. Þar hefur hann unnið úr reynslu sinni og um leið fjallað um harðan raunveruleika íslenskra undirheima.

Fyrsta plata Birgis sem heitir Birgir Hákon kom út árið 2019. Hún vakti töluverða athygli vegna orðstírs hans og naut þar að auki töluverðra vinsælda. Birgir hefur síðan þá gefið út nokkra singúla sem margir hafa orðið stórir smellir. Aðdáendur hafa hins vegar þurft að bíða lengi eftir nýrri plötu. Nú er hún að koma út og því ákvað blaðamaður að taka púlsinn á Birgi.

Þú ert að gefa út plötuna 111. Hverju eiga hlustendur von á?

„Þetta er samansafn af efni sem ég er búinn að sanka að mér seinustu ár. Stórt EP myndi ég segja, mixtape-vibe, en samt varð þetta einhvern veginn að plötu, það kom strúktúr á þetta. Þetta er um lífið, hvernig þetta var og hvernig þetta er,“ segir Birgir.

Hverfið sem bjó til Birgi Hákon

Birgir segir æsku sína hafa einkennst af rótleysi og tíðum flutningum. Honum finnst samt mikilvægt að reppa Efra-Breiðholt enda hafi það hverfi mótað hann einna mest. Ljósmynd sem Breiðhyltingurinn Friðgeir Trausti Helgason tók árið 2008 í póstnúmeri 111 prýðir einmitt kápuna.

Titillinn vísar í 111 í Efra-Breiðholti. Hvers vegna?

„Ég ólst upp úti um allt, var á mjög miklu flakki og í kringum tíu grunnskólum. Við vorum í basli þegar ég var yngri,“ segir Birgir og bætir við að fjölskyldan hafi upplifað það að missa íbúðir, vera heimilislaus og búa í sumarbústað. 

„Svo var ég mikið í Breiðholtinu. Vinur minn flutti þangað og ég í kjölfarið. Ég er búinn að búa út um allt en 111 er hverfið sem bjó til Birgi Hákon.“

Fjallar platan þá mikið um hverfið?

„Klárlega, hvernig var að búa þar og æskuárin.“

Það eru fimm ár liðin frá fyrstu plötunni. Hvað ertu búinn að vera að bauka?

„Ég er búinn að vera gefa út eitt og eitt lag. Annars er búið að vera mikið í gangi í fjölskyldunni. Ég er búinn að vera að sinna því. Mamma mín var með krabbamein og dó núna í febrúar. Hún var búin að vera mikið veik.“ 

Birgir var til umfjöllunar í Ísland í dag árið 2019 og ræddi þar um uppvaxtarár sín, tónlistina og veikindi móður sinnar.

Skotheld vesti, kúlur og flex

Á 111 er að finna lögin „Engin miskunn,“ „Skotheldu vesti“ og „Kúlur.“ Þó Birgir hafi yfirgefið sinn gamla heim er ljóst að hann er honum enn hugleikinn.

Ertu ekkert farinn að fjarlægjast þennan harða heim?

„Klárlega, maður er ekki nálægt þessu í dag. Maður á gamla vini, æskuvini og heyrir alltaf eitthvað. Ég er ekki lengur þessi gaur nema í tónlistinni. En maður tjáir reynslu í gegnum tónlistina. Þar á ég alveg nóg inni,“ segir Birgir.

Hefurðu þróast mikið sem tónlistarmaður á þessum fimm árum?

„Alveg helling, sum þessara laga tengi ég varla við. Elsta lagið þarna átti að vera á hinni plötunni og var tekið upp fyrir sex árum,“ segir Birgir og bætir við að það sé í raun leynilag sem sé ekki á lagalistanum á bakhlið plötunnar.

„Þetta er lag sem við Birnir gerðum 2018 og tókum aftur upp á nýtt fyrir tíu dögum og rush-uðum í mix og það kemur út í dag.“

Hvað heitir það lag?

„Það heitir Freakshow.“

Strax byrjaður að hugsa um framtíðina handan 111

Er þetta náttúruleg þróun frá síðustu plötu eða ertu að breyta til?

„Þetta er smá í takt við síðustu plötu en með nýju ívafi. Mér finnst þetta samt ekki vera úthugsuð stúdíóplata, þar sem hvert lag er útpælt, heldur meira safn af stökum lögum. En ég er strax byrjaður að vinna í næstu plötu sem verður miklu umfangsmeira og stærra verk.“

Platan 111 kemur út í dag og hefst útgáfuhófið upp úr 21 á Prikinu. Þar ætlar Birgir að flytja lög af nýju plötunni ásamt góðum gestum, þar á meðal Þorra og Krabbamane, sem aðdáendur rapparans ættu að kannast við.

Útgáfa sem þessi eru tímamót hjá öllum tónlistarmönnum. Það er ekki auðvelt að gefa út heila plötu og hvað þá aðra til. En Birgir virðist ekki ætla að staldra lengi við 111 og er þegar byrjaður að horfa til framtíðar.

„Það er meira dót á leiðinni, ég ætla að vera full-on í tónlist næstu tvö ár og gera eitthvað stórt,“ segir Birgir Hákon að lokum.